این ڈی ایم سی کے پنشن ہیلپ ڈیسک کا آغاز

نئی دہلی میونسپل کونسل (این ڈی ایم سی) نے اپنے ملازمین کے لیے پنشن ہیلپ ڈیسک اور میونسپلٹی پنشنرس ڈے کا آغاز کیا ہے، اس میں ایک سال کے اندر سبکدوش ہونے والے ملازمین کی سہولت اور مدد کے لیے مہینے کے پہلے پیر کے روز پینشن ہیلپ ڈیسک کا اہتمام کیا جائے گا۔

نئی دہلی میونسپل کونسل کے اقتصادی مشیر پی اپادھیائے نے این ڈی ایم سی کنونشن سینٹر میں آج پہلے پنشن ہیلپ ڈیسک کا افتتاح کیا۔

پی اپادھیائے نے کہا کہ پالیکا پریشد نہ صرف اپنے ملازمین کی فلاح و بہبود کے لیے ہمیشہ تیار رہتا ہے، بلکہ بطور پنشن یافتگان بھی ان کی نگہداشت بھی کرتا ہے، ان کی پریشانیوں کو حل کرنے کے لیے کونسل ہر ماہ کے پہلے پیر کے روز پنشن ہیلپ ڈیسک کا انعقاد کرے گی، تاکہ ایک سال کے اندر ریٹائر ہونے والے ملازمین کو پنشن کی گرانٹ کے لیے درکار تمام دستاویزات کو بھرنے میں مدد مل سکے۔

انہوں نے یہ بھی بتایا کہ اس پنشن ہیلپ ڈیسک میں پنشن یافتگان کی شکایات بھی سنی جائيں گی اور پنشن کورٹ کی طرح ان کو حل کیا جائے گا، اس پنشن ہیلپ ڈیسک کو محکمہ پنشن، محکمہ فلاح وبہبود، اسٹیبلشمنٹ برانچ اور ایس بی آئی کے ذریعہ مشترکہ طور پر منعقد کیا جائے گا۔

اس موقع پرڈائریکٹر آر پی ستی، اکاؤنٹس، پنشن، محکمہ بہبود کے اعلی حکام کے ساتھ سو سے زائد ملازمین نے شرکت کی۔