ایس آئی او نے امتحانات کی منسوخی کا خیر مقدم کیا

ایس آئی او نے سی بی ایس ای 12 ویں جماعت کے امتحانات کی منسوخی کا استقبال کیا۔

اسٹوڈنٹس اسلامک آرگنائزیشن آف انڈیا نے آج مرکزی حکومت کی جانب سے 12 ویں جماعت کے امتحانات کی منسوخی کے فیصلہ کا خیر مقدم کرتے ہوئے کہا کہ' طلباء کی صحت اور تحفظ کے لیے بارہویں بورڈ کے امتحانات کی منسوخی ایک اہم فیصلہ ہے، جس کا ہم استقبال کرتے ہیں۔

وباء کے آغاز سے ہی کئی بار خطوط کے ذریعہ ایس آئی او مرکزی حکومت سے مطالبہ کرتی آئی ہے کہ امتحانات کی منسوخی کا اعلان کیا جائے۔ اس فیصلے میں تاخیر کی وجہ سے طلبہ کی تعلیمی سفر کے دوران انہیں پریشانیوں سے دورچار ہونا پڑا۔' اس سے سیاسی قائدین اور حکومت کی طلبہ کے تعلیمی و فلاحی مسائل کے حل کے تئیں ترجیحات کا اندازہ لگایا جاسکتا ہے۔

واضح رہے کہ حکومت نے کورونا سے پیدا ہونے والی غیر یقینی صورتحال کے پیش نظر سنٹرل بورڈ آف سیکنڈری ایجوکیشن کے بارہویں جماعت کے امتحانات منسوخ کرنے کا فیصلہ کیا ہے۔

منگل کو وزیر اعظم نریندر مودی کی زیر صدارت منعقدہ ایک اعلی سطحی میٹنگ میں یہ فیصلہ کیا گیا۔ یہ بھی فیصلہ کیا گیا کہ سی بی ایس ای بورڈ مکمل طور پر طے شدہ معیارات کی بنیاد پر، مقررہ وقت میں بارہویں جماعت کے نتائج تیاری کرنے کے اقدامات کرے گا۔

میٹنگ میں یہ بھی فیصلہ کیا گیا کہ گزشتہ برس کی طرح اگر کچھ طلبا امتحان دینا چاہتے ہیں تو بورڈ انہیں یہ متبادل فراہم کرے گا، لیکن اگر حالات سازگار ہوجائیں تو یہ امتحان لیا جائے گا۔

عہدیداروں نے امتحانات سے متعلق مختلف فریقین اور ریاستی حکومتوں کے ساتھ اب تک ہونے والے غور و خوض کے بارے میں وزیر اعظم کو ایک پریزنٹیشن پیش کی۔ اس کے بعد، صورتحال کا جائزہ لینے کے بعد، فیصلہ کیا گیا کہ رواں برس بارہویں کے امتحان کا انعقاد نہیں کیا جائے گا۔