’سات مئی کے بعد بیرون ملک میں پھنسے ہندستانیوں کو واپس لایا جائے گا‘

عالمی وبا کوروناوائرس کے سبب بیرون ممالک خصوصا نیپال میں پھنسے ہندوستانی شہریوں کو واپس لانے کا مطالبہ زور پکڑتا جا رہا ہے۔

مرکزی حکومت نے منگل کو سپریم کورٹ کو بتایا کہ بیرون ملک پھنسے تمام غیرمقیم ہندستانیوں کو سات مئی کے بعد خصوصی چارٹرڈ طیاروں کے ذریعے ملک واپس لایا جائے گا جس کے لئے منصوبہ تیار کیا جا چکا ہے۔

مرکزی حکومت کی طرف سے سالیسٹر جنرل تشار مہتا نے یہ اطلاع جج اشوک بھوشن، جج سنجے کشن کول اور جج بی آر گوئی پر مشتمل تین رکنی بنچ کو گنگا گیری کی عرضی پر سماعت کے دوران دی۔

مرکزی حکومت نے بنچ کو بتایا کہ سات مئی سے بیرون ملک پھنسے ہندستانیوں کو واپس لایا جائے گا اور اس کے لئے وزارت خارجہ نے پوری تیاری کر لی ہے۔ اس منصوبہ کے تحت نیپال میں پھنسے ہندستانیوں کو لایا جانا بھی شامل ہے۔

عرضی گزار نے نیپال میں آباد 1000سے زیادہ ہندستانیوں کے پھنسے ہونے کا حوالہ دیتے ہوئے انہیں واپس لانے کی ہدایت دیئے جانے کی درخواست کی تھی۔