راہل نے صحافی کے قتل پر گہرے غم و غصے کا اظہار کیا

کانگریس کے سابق صدر راہل گاندھی نے این سی آر کے غازی آباد میں بھانجی کے ساتھ بدسلوکی کی مخالفت کرنے پر ایک صحافی کو گولی مارنے کے واقعے پر شدید غم و غصے کا اظہار کرتے ہوئے الزام لگایا ہے کہ 'رام راج دینے کا وعدہ کرنے والی بھارتیہ جنتا پارٹی (بی جے پی) کے دور اقتدار میں ریاست میں غنڈہ گردی بڑھی ہے۔'

گاندھی نے بدھ کے روز ٹویٹ کیا کہ 'صحافی وکرم جوشی کو اپنی بھانجی کے ساتھ بدسلوکی کی مخالفت کرنے پر قتل کر دیا گیا۔ سوگوار خاندان سے میری تعزیت۔ وعدہ تھا رام راج کا، دے دیا غنڈہ راج۔'

قابل ذکر بات یہ ہے کہ غازی آباد کے وجے نگر میں جوشی نے اپنی بھانجی سے بدسلوکی کی مخالفت کرتے ہوئے پولیس میں شکایت کی تو غنڈوں نے انہیں گولی مار دی۔ اس سے متعلق نو افراد کو گرفتارکیا گیا ہے اور یہ امید کی جارہی ہے کہ جلد ہی ان کے اہل خانہ کو انصاف ملے گا۔

اترپردیش کی جنرل سکریٹری انچارج پرینکا گاندھی واڈرا نے بھی اس واقعے پر اتر پردیش حکومت پر حملہ کرتے ہوئے کہا تھا کہ ریاست میں لاء اینڈ آرڈر کا یہ عالم ہے تو آپ پوری ریاست میں قانون و انتظام کی صورتحال کا اندازہ لگا لیجیے۔ ریاست کے جنگل راج میں ایک صحافی کو اس لئے گولی مار دی گئی کہ اس نے اپنی بھانجی کے ساتھ چھیڑ چھاڑ کرنے پر پولیس میں تحریری شکایت کی تھی۔