سرکاری اسکول کے ٹیچر نے ستار بجانے کا بنایا عالمی ریکارڈ

کسی بھی میدان میں عالمی ریکارڈ بنانا ہر کسی کا خواب ہوتا ہے۔ دہلی کے دوارکار سرکاری اسکول کے ٹیچر راج کمار نے ستار بجانے میں عالمی ریکارڈ بنایا ہے۔

نئی دہلی: دہلی کے ایک سرکاری اسکول کے استاذ ستار کے ساتھ اسٹیج پر بیٹھے تو شاید یہ کسی کو معلوم نہ ہو گا کہ 24 اگست کی دوپہر کے بعد وہ ایسا کارنامہ سرانجام دیں گے کہ ان کے نام تاریخ کے صفحات پر سنہری حروف میں لکھے جائیں گے۔ موسیقی کے استاد اور ستار بجانے والے راج کمار نے مسلسل 30 گھنٹے ستار بجا کر گنیز بک آف ورلڈ ریکارڈ میں نام درج کرایا ہے۔ آج پوری دہلی کو اس کامیابی پر فخر ہے۔

راج کمار راجکیہ پرتیبھا وکاس ودیالہ، سیکٹر 19، دوارکا میں میوزک ٹیچر ہیں۔ ستار ان کے پسندیدہ آلات میں سے ایک ہے۔ ان کا یہ شوق ایک دن عالمی ریکارڈ بنائے گا، شاید انہیں اس بات کا احساس تک نہیں تھا۔

راج کمار نے 23 اگست کی صبح 8 بجے ستار بجانا شروع کیا۔ اس کے لیے دوارکا سیکٹر 19 میں واقع اسکول آف اسپیشل ایجوکیشن کو منتخب کیا۔ انہوں نے منگل کی دوپہر 2 بجے تک مسلسل 30 گھنٹے ستار بجا کر گنیز بک آف ورلڈ ریکارڈ میں اپنا نام درج کرایا۔

دہلی کے نائب وزیراعلی سمیت لوگوں نے تالیاں بجا کر ان کی حوصلہ افزائی کی۔

اس کے لیے گنیز بک آف ورلڈ ریکارڈ کے عہدیداران آن لائن موجود تھے۔

اس سے قبل کیرالہ کے رادھاکرشنن منوہر نے اکتوبر 2017 میں 29 گھنٹے اور آٹھ منٹ تک ستار بجا کر گنیز بک آف ورلڈ ریکارڈ اپنے نام کیا تھا۔

معلوم ہوکہ ستار ہندوستان کے سب سے مشہور موسیقی کے آلات میں سے ایک ہے۔ یہ کلاسیکی موسیقی سے لے کر ہر قسم کی موسیقی میں استعمال ہوتا ہے۔ ستار ایک مکمل طور پر بھارتی آلہ ہے، کیونکہ اس میں ہندوستانی آلات کی تینوں خصوصیات ہیں۔
ستار سے تھوڑا بڑا آلہ سر بہار آج بھی استعمال میں ہے لیکن ستار سے زیادہ مقبول کوئی آلہ نہیں ہے۔ اس کی آواز کو دوسری شکل میں لانے کی کوشش کی گئی لیکن ستار جیسی میٹھی آواز حاصل نہیں کی جا سکی۔