مہاجر مزدوروں کی دہلی واپسی

دارالحکومت دہلی میں کورونا کے سبب لاک ڈاؤن میں پریشان لاکھوں یومیہ مزدور اپنے آبائی وطن ہجرت کر گئے تھے لیکن اب روزگار کی تلاش میں دوبارہ دہلی کی جانب رخ کررہے ہیں۔

کورونا بحران میں متعدد ریاستوں کے مزدوروں کی ایک بڑی تعداد کورونا کے خوف سے دارالحکومت دہلی سے اپنے آبائی وطن ہجرت کر گئی تھی، لیکن اب روزینہ مزدور دہلی کی جانب ذریعہ معاش کے لیے واپس بھی آرہے ہیں۔

یومیہ مزدوروں کو دہلی سے اہنے آبائی وطن ہجرت کرنے میں بھی کافی زیادہ مشکلات اور مصائب کا سامنا کرنا پڑا تھا چونکہ یہ لوگ لاک ڈاؤن میں روزگار کے ختم ہو جانے کی وجہ سے اپنے اپنے گھروں کی جانب ہجرت کرنے پر مجبور تھے تاہم لاک ڈاؤن ختم ہونے سے کاروبار تو شروع ہوئے ہیں لیکن ان مزدوروں کے چلے جانے سے فیکٹریوں میں کام کرنے کے لیے مزدور نہیں مل رہے ہیں جس کی وجہ سے بہت سے شعبوں میں کام متاثر ہو رہا ہے۔

وہیں دوسری جانب جو یومیہ مزدور اپنے گاؤں یا آبائی وطن روانہ ہوئے تھے ان کو وہاں پر بھی کوئی روزگار یا ذریعہ معاش نہ ہونے کی وجہ سے ان مزدوروں کو ضروریات زندگی کے لیے پھر انہیں مقامات پر لوٹنا پڑے گا جہاں سے وہ لوگ کوچ کر گئے تھے۔

دارالحکومت دہلی میں ایسا ہی ایک کنبہ جس کے تمام افراد کورونا بحران میں لاک ڈاون کے دوران اپنے آبائی وطن بہار چلا گیا تھا لیکن اب وہ روزگار اور ذریعہ معاش کے لیے دہلی واپس آگئے ہیں۔

راج کمار منی کا یہ خاندان گزشتہ 22 برسوں سے دہلی کے علی پور میں رہائش پذیر تھا لیکن لاک ڈاؤن اور کورونا سے اس قدر خوفزدہ ہوا کہ پورا خاندان دہلی سے اپنے آبائی وطن بہار چلا گیا تھا۔

راج کمار اور تیسورج منی کے مطابق ان کے تمام کام دہلی میں تھے تو وہ آبائی گاؤں میں زیادہ دن رک نہیں سکتے تھے، اس کے علاوہ انھوں نے اپنے پیچھے ایک بزرگ کو دہلی میں ہی چھوڑ رکھا تھا۔

انھوں نے مزید کہا کہ ٹیگی پور گاؤں کے دگ وجے نامی شخص نے کورونا بحران میں انہیں گاؤں بھیجا تھا جس کے یہاں کام کرتے تھے اور انھون نے ہی ہماری درخواست پر ٹکٹ بھیج کر ہمیں واپس دہلی بھی بلا لیا ہے۔

دہلی کے لوگوں کے لیے خوش کن بات ہے کہ ہجرت کرنے والے لوگوں نے ایک بار پھر دہلی جانا شروع کردیا ہے۔ لوگوں کو اس بات کا بھی علم ہو چکا ہے کہ کورونا اب جلد جانے والا نہیں ہے ۔لہذا انتطار ممکن نہیں۔