کمار وشواس کا کیجریوال پر طنز

دہلی کے وزیر اعلیٰ اور عام آدمی پارٹی کے کنوینر اروند کیجریوال کے بے حد خاص، شاعر کمار وشواس نے قومی دار الحکومت میں کورونا وائرس کے دن بہ دن خوفناک شکل اختیار کرنے کی صورت میں ڈاکٹرز اور ہیلتھ سسٹم پر اس کا ٹھیکرا پھوڑنے کے لیے دہلی سی ایم کو آڑے ہاتھوں لیتے ہوئے شدید طنز کیا۔

دہلی میں کورونا وائرس کے سلسلے میں انہوں نے ڈاکٹرز اور ہیلتھ سسٹم پر ٹھیکرا پھوڑا اور سر گنگا رام پر ایف آئی آر بھی درج کروائی گئی۔ دہلی میڈیکل ایسوسی ایشن نے اس کی شدید مخالفت کرتے ہوئے اسے حوصلہ شکنی قرار دیا ہے۔

شاعر کمار وشواس نے ایسوسی ایشن کی جانب سے وزیر اعلیٰ کو لکھے احتجاجی خط پر اتوار کو ری ٹویٹ کرتے ہوئے لکھاکہ' پلیز آپ سب ڈاکٹر بالکل برا مت مانیے، آپ بس متاثرین کا علاج کرتے رہیے ۔

انہوں نے کیجریوال پو ہدف تنقید بناتے ہوئے کہا کہ' انہوں نےذمہ داری کا ٹھیکرا مودی، مرکز، ایم سی ڈی پر پھوڑتے پھوڑتے اس بار تھک کر اپنے نکمے پن کا ٹھیکرا آپ لوگوں پر پھوڑ دیا ہے۔ بس انتخابات سے ٹھیک پہلے پھر معافی مانگ لے گا۔عادت ہے اسے آزمائے ہوئے نسخے کی۔