کیا جمعیت علماء ہند دہلی حکومت کے خلاف کارروائی کرے گی؟

دہلی کے وزیراعلی اروند کیجریوال کے کہنے پر 31 مارچ کو تبلیغی جماعت کے سربراہ مولانا سعد سمیت دیگر چھ افراد اور مرکز نظام الدین کے ذمہ داران کے خلاف ایک ایف آئی آر دائر کی گئی تھی۔

دارالحکومت دہلی کے ساکیت کورٹ نے تبلیغی جماعت کے خلاف چل رہے کیس میں تمام ملزمان کو باعزت بری کیا تھا جس کے بعد سے سوشل میڈیا پر دہلی کے وزیراعلی اروند کیجریوال اور میڈیا چینلز سے معافی مانگنے کا مطالبہ کیا جا رہا ہے۔ اس کو لے کر اب جمعیت علماء ہند کے ریاستی نائب صدر مولانا داؤد امینی نے بھی کیجریوال سے معافی مانگنے کا مطالبہ کیا ہے۔

دراصل دہلی کے وزیراعلی اروند کیجریوال کے کہنے پر 31 مارچ کو تبلیغی جماعت کے سربراہ مولانا سعد سمیت چھ دیگر افراد اور مرکز نظام الدین کے ذمہ داران کے خلاف ایک ایف آئی آر دائر کی گئی تھی۔

تاہم جب یہ معاملہ عدالت میں پیش ہوا تو پولیس عدالت میں کچھ بھی ثابت نہیں کر پائی بلکہ جج کی جانب سے چارج شیٹ پر بھی سوالات کھڑے کر دیے گئے۔

ای ٹی وی بھارت کے نمائندے نے جمعیت علماء ہند کے صوبہ دہلی کے نائب صدر سے بات کی جس میں انہوں نے کہا کہ کیجریوال کو شرم آنی چاہیے۔ انہوں نے مزید کہا کہ کیجریوال سرکار نے ایف آئی آر درج کرانے میں تو بہت پھرتی دکھائی تھی لیکن کیا اب وہ معافی مانگنے میں بھی ایسا کرے گی؟