مسجد میں آئیں تو احتیاط برتیں: مفتی مکرم

دہلی کی شاہی مسجد فتح پوری کے امام ڈاکٹر مفتی مکرم احمد نے نمازیوں سے اپیل کی ہے کہ وہ مسجد میں داخل ہونے پر احتیاط برتیں۔ مرکزی حکومت کی جانب سے آئی گائیڈ لائنز کے بعد سے ہی تمام مذہبی مقامات کو کھولنے کی تیاریاں جاری ہیں۔

مرکزی حکومت کے مطابق 8 جون سے تمام مذہبی مقامات پر عائد پابندیاں ہٹا لی جائیں گی، تاہم دہلی حکومت کی جانب سے ابھی گائیڈ لائنز جاری نہیں کی گئی ہیں۔

ایسے میں شاہی مسجد فتح پوری مسجد کے امام ڈاکٹر مفتی مکرم احمد نے لوگوں سے اپیل کی ہے کہ اگر وہ مسجد میں آئیں تو احتیاط برتیں اور حکومتی ہدایات پر عمل کریں۔

مفتی مکرم نے مسجد میں آنے والے مصلیوں کے لیے ہدایت جاری کی ہیں جس میں ماسک لگانا ضروری ہے اور وضو گھر سے ہی کرکے آنے کی ہدایات دی گئی ہیں، ساتھ ہی 65 برس سے زائد اور 12 برس سے کم عمر کے لوگوں کو مسجد میں داخلہ کی ممانعت ہے۔

اس کے علاوہ مسجد میں کسی سے مصافحہ یا زیادہ دیر مسجد میں ٹھہرنا منع کیا گیا ہے، اور حکومت کی ہدایت پر عمل کرنے کو بھی کہا گیا ہے۔

مفتی مکرم نے بتایا کہ 8 جون سے نمازی مسجد آئیں گے، اس کے لیے کچھ تیاریاں بھی کرلی گئی ہیں، مسجد سے قالین ہٹا دیا گیا ہے تاکہ فرش پر ہی نماز ادا کی جائے یا نمازی اپنی جائے نماز اپنے ساتھ لیکر آئیں، وضو کا حوض بھی مکمل طور پر بند کر دیا گیا ہے۔

اس کے ساتھ ہی جوتے چپلوں کو بھی مسجد سے باہر اتارنے کی ہدایات دی گئی ہے۔