جے این یو پولیس چھاؤنی میں تبدیل

جواہر لعل نہرو یونیورسٹی میں پانچ جنوری کی رات نقاب پوش غنڈوں کے حملہ کے بعد صبح سے ہی دہلی پولیس کی بھاری نفری جے این یو میں تعینات کی گئی ہے۔

اطلاعات کے مطابق زخمی طلبا اور اساتذہ ہسپتال سے ڈسچارج ہو کر جے این یو پہنچ چکے ہیں، جن میں زیادہ تر افراد نے 'جے این یو 'ایس یو ' اور جے این یو ٹی اے کے مشترکہ امن مارچ میں شامل ہونے کا اعلان کیا ہے۔
یہ امن مارچ سابرمتی ہاسٹل سے نکالا جارہا ہے، جس کے اختتام پر ایک پریس کانفرنس بھی ہونی ہے۔

وہیں دوسری طرف اکھل بھارتیہ ودھیارتی پریشد جس پر غنڈہ گردی کے الزامات ہیں اور ابتدائی نشانات اے بی وی پی کی غنڈہ گردی کی تصدیق بھی کر رہے ہیں، ان جماعتوں نے بھی پریس کانفرنس کرنے کا اعلان کیا ہے۔

واضح رہے کہ سوشل میڈیا پر کئی ایسے وہاٹس ایپ چیٹ وائرل ہو رہے ہیں جس میں خود اے بی وی پی کے کارکنان جے این یو میں گھس کر تشدد کرنے کا اعتراف کر رہے ہیں۔ جن نمبروں سے پیغامات ترسیل ہوئے ہیں ان میں وہ نمبر شامل ہیں جو اے بی وی پی کے کارکنان کے بتائے جارہے ہیں۔