پھانسی کی التوا پر نربھیا کی ماں نے یہ باتیں کہیں

نربھیا اجتماعی جنسی زیادتی اور قتل کے معاملے میں سزائے موت کے چاروں مجرمین کی تیسری بار پھانسی رکنے کے بعد متاثرہ کی والدہ نے عدالت کے اس فیصلے پر مایوسی کا اظہار کیا ہے۔

نربھیا کی ماں آشا دیوی نے کہاکہ' عدالت مجرمین کو پھانسی دینے کے اپنے حکم پر عمل کرنے میں اتنا وقت کیوں لگارہی ہے؟ بار بار پھانسی کا ملتوی ہونا ہمارے نظام کی ناکامی کو ظاہر کرتا ہے۔'

دہلی کی ایک عدالت نے پیر کو اس معاملے میں سزائے موت کے چار مجرموں کی پھانسی پر روک لگا کر مزید احکامات کے لئے اس معاملے کو موخر کردیا ہے۔

ایڈیشنل سیشن جج دھرمیندر رانا نے اس معاملے میں تمام فریقین کے دلائل سننے کے بعد پون گپتا کی جانب سے داخل درخواست پر یہ حکم محفوظ کرلیا تھا۔

صدر رام ناتھ کووند نے 5 فروری کو مجرم اکشے ٹھاکر کی رحم کی درخواست مسترد کردی تھی۔ اب تک ونے شرما اور مکیش سنگھ کی رحم کی درخواستیں بھی مسترد کردی گئیں۔

واضح رہے کہ یہ معاملہ دہلی میں16 دسمبر 2012 کی رات ایک چلتی بس میں 23 سالہ پیرا میڈیکل طالب علم کے ساتھ اجتماعی زیادتی اور قتل سے متعلق ہے۔ جس کے کچھ دن بعد سنگاپور کے ایک اسپتال میں اس کا انتقال ہوگیا تھا۔