دہلی فساد: اپنے ہی پولیس اہکاروں کا لائی ڈیٹیکٹر ٹسٹ کرائے گی دہلی پولیس

گزشتہ سال شمال مشرقی دہلی میں ہونے والے فسادات کے دوران اقلیتی نوجوانوں سے زبردستی قومی ترانے پڑھوانے کے معاملے میں دہلی پولیس اپنے ہی تین پولیس اہلکاروں کی لائی ڈیٹیکٹر ٹسٹ کرائے گی۔

دہلی پولیس گزشتہ سال شمال مشرقی دہلی میں ہونے والے فسادات کے حوالے سے اپنے ہی تین پولیس اہلکاروں کا جھوٹ پکڑنے والا ٹسٹ (لائی ڈیٹیکٹر ٹسٹ) کرانا چاہتی ہے۔ پولیس کو شبہ ہے کہ کچھ نوجوانوں کو پیٹنے اور انہیں قومی ترانہ زبردستی بُلوانے میں وہ ملوث تھے۔ اس واقعہ میں فیضان نامی نوجوان مار پیٹ کی وجہ سے ہلاک ہوگیا۔ اس سلسلے میں قتل کا مقدمہ بھی درج کیا گیا ہے۔ جس کا ویڈیو سوشل میڈیا پر خوب وائرل ہوا تھا۔

جانکاری کے مطابق 25 فروری 2020 کا ایک ویڈیو وائرل ہوا تھا۔ جس میں کچھ پولیس والے زمین پر گرے نوجوانوں کو پیٹ رہے تھے۔ ان سے زبردستی قومی ترانہ گانے کے لیے کہا جارہا تھا۔ یہاں چار سے پانچ نوجوانوں کو پولیس والوں نے بے رحمی سے مارا پیٹا تھا۔ پیٹنے کے بعد پولیس انہیں جیوتی نگر تھانے لے گئی۔ وہاں سے انہیں بعد میں رہا کردیا گیا۔

گھر جانے کے بعد فیضان کی طبیعت بگڑ گئی اور ہسپتال لے جانے پر اس کی موت ہوگئی۔ اس واقعے کے حوالے سے قتل کا مقدمہ درج کیا گیا تھا اور ملزم پولیس اہلکاروں کی تلاش گزشتہ ڈیڑھ سال سے جاری ہے۔

ذرائع سے ملی اطلاع کے مطابق کوتوالی میں موجود کرائم برانچ کی ٹیم معاملے کی جانچ کررہی ہے۔ تفتیش کے دوران انہیں پتہ چلا کہ پٹائی کرنے والے پولیس اہلکار بٹالین کے نوجوان تھے۔ اس کے ساتھ ہی ویڈیو میں ایک پولیس والا آنسو گیس کے گولے کے ساتھ دیکھا گیا۔

پولیس نے اب ایسے پولیس اہلکاروں کی لسٹ نکالی ہے جنہیں آنسو گیس کے گولے دیے گئے تھے۔ ان سے ہوئی پوچھ تاچھ کے بعد آخرکار پولیس والوں کی نشاندہی کی گئی، جن کے اس واردات میں شامل ہونے کا شک ہے۔ یہ پولیس والے واردات میں شامل ہونے کی بات سے انکار کررہے ہیں۔ جس کے بعد پولیس اب ان کا لائی ڈٹیکٹر ٹسٹ کروانا چاہ رہی ہے۔ اس کے لئے پولیس اہلکاروں سے اجازت مانگی گئی ہے۔

یہ بھی پڑھی: '72 برس بعد مسلمانوں سے وطن پرستی کا ثبوت مانگا جا رہا ہے'