دہلی: راشن کارڈ کے بغیر بھی ملے گا مفت راشن

کورونا وبا اور لاک ڈاؤن(lockdown) کے دوران بہت سارے افراد کی ملازمت چلی گئی جس کی وجہ سے وہ معاشی بحران کا شکار ہوگئے ایسے لوگوں کے لیے دہلی حکومت نے مفت راشن کا نظام شروع کیا۔

مفت راشن فراہم کرنے کے سلسلے میں گزشتہ روز ایک اسکیم شروع کی گئی جس کے تحت جن کے پاس راشن کارڈ نہیں ہے انہیں بھی راشن دیا جائے گا۔

دہلی کے سرکاری اسکولوں میں اس سہولت کے لیے اسٹال لگائے گئے ہیں۔ جہاں آدھار کارڈ دکھا کر موبائل نمبر پر رجسٹریشن کروانا پڑے گا جس کے بعد بغیر راشن کارڈ کے راشن ملے گا۔

واضح رہے کہ دہلی حکومت کورونا بحران اور لاک ڈاؤن کے پیش نظر دہلی کے 72 لاکھ افراد کو مفت راشن فراہم کرانے کا اعلان کیا تھا جس کا سلسلہ جاری ہے۔ شدید تنقید کے بعد اب دہلی حکومت ایسے غریب افراد کو بھی بغیر راشن کارڈ کے مفت میں راشن فراہم کرنے کا اعلان کیا ہے جن کی کورونا بحران کے دوران نوکری چلی گئی ہے۔