دہلی حکومت سرکاری ہسپتالوں میں مریضوں کے لیے بیڈ کی تعداد میں اضافہ کرنے کا منصوبہ بھی بنا رہی ہے۔ سرکاری ہسپتالوں میں بیڈ نہیں ہونے کی وجہ سے اکثر مریضوں کو پریشانی کا سامنا کرنا پڑتا ہے۔ خاص طور سے سنگین امراض سے متاثر افراد کو ضرورت کے وقت آئی سی یو میں وینٹیلیٹر نہیں مل پاتا۔
یہ بھی خبر آئی ہے کہ سرکاری ہسپتالوں میں وینٹیلیٹر خالی رہتے ہیں پھر بھی مریضوں کو یہ کہہ کر دوسرے ہسپتال منتقل کر دیا جاتا ہے کہ یہاں وینٹیلیٹر نہیں ہیں۔
اسی کے مد نظر دہلی حکومت کا محکمہ صحت آن لائن پلیٹ فارم تیار کر رہا ہے۔ اس کے ذریعے ہسپتالوں میں بیڈ کی موجودگی کا پتہ چل سکے گا۔
کچھ ماہ قبل کئی ہسپتالوں میں ضرورت مند مریضوں کو وینٹیلیٹر نہ ہونے پر مریضوں کو امبو بیگ (ایئر بیگ) کے سہارے مریضوں کو سانس دینے کے معاملے سامنے آئے۔ یہ معاملہ دہلی ہائی کورٹ میں بھی گیا تھا۔ اس کے بعد عدالت نے محکمہ صحت کو سبھی سرکاری ہسپتالوں میں موجود وینٹیلیٹر کی آن لائن جانکاری دینے کے لیے کہا تھا۔
اس سہولت کے شروع ہو جانے کے بعد مریضوں کو وینٹیلیٹر دینے سے انکار کرنا آسان نہیں ہوگا۔ کیوں کہ تیمار دار ہسپتالوں میں وینٹیلیٹر کی تعداد آن لائن معلوم کر سکیں گے۔
