معروف شاعر ڈاکٹر سعید اعظمی کا انتقال

بزرگ شاعر اور بزم شیدائے اردو متھرا کے روح رواں سعید اعظمی عرف سعید انصاری کا آج صبح انتقال ہوگیا ، وہ ممبئی میں پریس انفارمیشن بیورو(پی آئی بی) کے ایک سنئیر رکن اختر انصاری کے والد بزرگوار ہیں۔

بزرگ شاعر اور بزم شیدائے اردو متھرا کے روح رواں سعید اعظم کا آج صبح 85 سال کی عمر میں انتقال ہوگیا۔ ان کے بیٹے اختر اعظمی نے بتایا کہ آج صبح تقریباً ساڑھے گیارہ بجے ان کے والد کی طبیعت اچانک خراب ہونے لگی، ہسپتال لے جانے کے دوران انہوں نے داعی اجل کو لبیک کہہ دیا۔
پسماندگان میں پانچ بیٹے اور چار بیٹیاں ہیں ، ایک بیٹی کا انتقال ہوگیا ہے۔ ان کی اہلیہ کا دس سال قبل انتقال ہوچکا ہے۔ان کاشعری مجموعہ سخن سعید 2016 میں منظر عام پر آ یا تھا اور حال میں پرواز سعید نامی مجموعہ شائع ہوا ہے۔

سعید اعظمی کو حال میں یونیورسٹی آف ساؤتھ امریکہ نے ڈاکٹر آف لیٹرس ( ڈی لٹ ) کی ڈگری سے نوازا تھا ، سعید انصاری کا تعلق مشرقی اتر پردیش کے مشہور شہر اعظم گڑھ سے ہے، لیکن 1960ء کی دہائی میں وہ کسی وجہ سے متھرا آئے اور پھر یہیں کے ہو کر رہ گئے ۔ انہوں نے وکالت کے ساتھ ساتھ مچھلیوں کا کاروباری شروع کردیا ،لیکن اردو کی محبت کو دل سے جدا نہیں کر سکے اور اس خطہ میں آہستہ آہستہ کم ہوتی جارہی اردوزبان کو نوجوانوں میں فروغ دینے کے لیے انہوں نے بیڑہ اٹھایا اور2001میں بزم شیدائے اردومتھراکی بنیاد ڈالی اور اردو کی ترقی و فروغ کے لیے اردوزبان کو مشاعروں اور تعلیم سے وابستہ کرنے کی جدوجہد کرتے رہے۔

بزرگ شاعر سعید انصاری نے متھرا میں اردو زبان و ادب کے فروغ کے لئے شروع میں چھوٹی چھوٹی شعری وادبی محفلیں منعقد کرنے لگے جس کی وجہ سے اردو داں طبقہ ان محفلوں میں شامل ہونے لگا، جس کی وجہ سے اس خطے میں بھی اردو زبان نے کافی ترقی کی ۔ سعید انصاری کو اردو کی ترقی اور فروغ کے لیے ان کی خدمت کے لیے یہ اعزاز دیا گیا ہے ۔ متھرا شہر برج بھاشا کے لیے مشہور ہے اور اس میں لا تعداد الفاظ اردو ، فارسی وغیرہ کے پائے جاتے ہیں ، اس لیے یہاں اردو کے فروغ کے زیادہ مواقع پاۓ جاتے ہیں ۔