سی اے اے: طلبا کے ساتھ مقامی افراد کا کینڈل مارچ

جامعہ کے طلبا کے مظاہروں کی گونج اب پورے بھارت میں سنائی دے رہی ہے۔ ملک کی مختلف ریاستوں سے سیاسی رہنماؤں سمیت بالی ووڈ اداکار طلبا کی حمایت میں دہلی پہنچ رہے ہیں۔

اب مقامی افراد بھی جامعہ کے طلبا کے ساتھ آئے ہیں اور شہریت ترمیمی ایکٹ کی شدید مخالفت کی جارہی ہے۔ جس کے خلاف طلبا سمیت مقامی لوگوں نے کینڈل مارچ نکالا۔

گذشتہ روز جن ادھیکار پارٹی کے سربراہ پپو یادو اور اداکارہ سورا بھاسکر بھی جامعہ پہنچے، جہاں انہوں نے احتجاج کر رہے طلبا کی حوصلہ افزائی کرتے ہوئے آزادی کے نعرے لگائے۔ سبھی نے یک زبان ہو کر 'ہمیں چاہیے آزادی، ہم لے کے رہیں گے آزادی' کے نعرے فضا میں بلند کیے'۔

وزیر اعظم مودی پر حملہ کرتے ہوئے سورا بھاسکر نے کہا کہ 'اگر حکومت اس ایکٹ کو واپس نہیں لیتی ہے تو پھر یہ مظاہرہ جاری رہے گا۔'

کانگریس کے سینیئر رہنما راشد علوی بھی جامعہ ملیہ پہنچے تھے، انہوں نے طلبا کی حوصلہ افزائی کرتے ہوئے کہا کہ 'اگر پرینکا گاندھی کو بھی یہاں آنا پڑے گا تو وہ بھی آئیں گی۔'

راشد علوی نے طلبا سے کہا کہ 'اگر آپ کا مطالبہ تسلیم نہیں کیا جاتا تو آپ لوگ مسلسل مظاہرہ کرتے رہیں۔'

اداکارہ و سیاسی لیڈران کے جانے کے بعد شام 7 بجے کے قریب جامعہ ملیہ اسلامیہ میٹرو اسٹیشن سے جامعہ ملیہ اسلامیہ کے گیٹ نمبر 7 تک کینڈل مارچ نکالا گیا۔

جس میں سیکڑوں مظاہرین نے شرکت کی اور شہریت ترمیمی ایکٹ کی سخت مخالفت کی اور یہ بھی آواز اٹھائی کہ حکومت اسے واپس لے اور ساتھ ہی 'ہمیں چاہیے آزادی' جیسے نعرے بھی لگائے۔

دلچسپ بات یہ تھی کہ ایک موٹر سائیکل پر بیٹھا آدمی کینڈل مارچ لیڈ کر رہا تھا اور اس کی قیادت میں مکمل کینڈل مارچ چل رہا تھا۔