بی جے پی کی 'منواسمرتی سوچ' نے صدر کو ایودھیا آنے سے روکا: سنجےسنگھ

ایودھیا میں بھومی پوجن پر عام آدمی پارٹی کے کنوینر و دہلی کے وزیراعلی اروند کیجریوال نے خوشی کا اظہار کیا تھا اور ملک کے لوگوں کو مبارک باد دی تھی، اسی عام آدمی پارٹی کے ترجمان اور راجیہ سبھا کے رکن سنجے سنگھ نے 'بھومی پوجن' کے پروگرام پر سوال کھڑے کیے ہیں۔

پروگرام میں صدر رام ناتھ کووند کو نہ بلائے جانے پر زبردست ناراضگی کا اظہار کرتے ہوئے کہا کہ بھارتیہ جنتا پارٹی کی منواسمرتی سوچ نے انہیں اس پروگرام میں شرکت سے روکا ہے۔
رکن پارلیمنٹ مسٹر سنجے سنگھ نے اپنے سلطانپور کے گبھڈیا میں واقع رہائش گاہ پر آج نامہ نگاروں سے بات چیت کی۔ ایک سوال کے جواب میں انہوں نے کہا کہ رام مندر مسئلہ پر آئین کے تحت عدالت عظمی کا جوبھی فیصلہ ہے، اسے سبھی کو ماننا چاہئے۔ ان کا کہنا ہے کہ بھارتیہ جنتا پارٹی کا شری رام جنم بھومی مندر سے کوئی لینا دینا نہیں ہے وہ صرف مندر کے نام پر سیاست کررہی ہے۔