وزیر آباد کے علاقے میں افغان نژاد (Afghan Youth ) نوجوان کو گولی مار کر قتل کر دیا گیا۔ وزیر آباد کے علاقے گلی نمبر 9 میں ایک خالی پلاٹ پر اتوار کی رات دیر گئے ایک شخص کو دیکھا گیا جس کے بعد آس پاس کے لوگوں نے پولیس کو اطلاع دی۔ تقریباً ساڑھے نو بجے پولیس کو اطلاع ملی کہ ایک شخص خالی پلاٹ کے پاس زخمی حالت میں پڑا ہے۔ پولیس نے موقع پر پہنچ کر زخمی کو اسپتال میں داخل کرایا جہاں ڈاکٹروں نے اسے مردہ قرار دے دیا۔
تفتیش میں معلوم ہوا کہ متوفی کا نام شیراز ہے جو کہ اصل میں افغانستان کا رہنے والا ہے اور دہلی کے علاقے بالیماران میں رہتا تھا اور کپڑے کا کاروبار کرتا تھا۔ شیراز وزیر آباد کے علاقے میں رشتہ دار سے ملنے آیا تھا لیکن وہ زخمی حالت میں رشتہ دار کے گھر کے قریب خالی پلاٹ سے دستیاب ہوا۔ شیراز کو سر کے قریب گولی مار کر ہلاک کر دیا گیا۔
فی الحال یہ واضح نہیں ہے کہ یہ قتل کیوں انجام دیا گیا۔ پولیس نے آس پاس نصب سی سی ٹی وی کیمروں کی تلاشی لی تاکہ ملزمان کی شناخت ہوسکے۔ سی سی ٹی وی کیمرے سے معلوم ہوا کہ قاتل تعداد میں ایک سے زیادہ تھے۔ پولیس لوگوں سے پوچھ تاچھ کر رہی ہے تاکہ پورے معاملے کا انکشاف ہو سکے۔