ساکشی مہاراج کا متنازع بیان، کہا 'گیان واپی لفظ تو اسلام کا ہے ہی نہیں'

اتراکھنڈ کے ہریدوار میں کمبھ میلے کے دوران نرمل اکھاڑہ کا جھنڈا لگانے کے موقع پر اناؤ سے رکن پارلیمان ساکشی مہاراج نے متنازع بیان دیا ہے۔

اتراکھنڈ کے ہریدوار میں کمبھ میلے کے دوران نرمل اکھاڑہ کا جھنڈا لگانے کے موقع پر اناو سے رکن پارلیمان ساکشی مہاراج نے گیان واپی معاملہ پر متنازع بیان دیتے ہوئے کہا کہ ''گیان واپی پر کیسا تنازع، یہ لفظ تو اسلام میں نہیں پایا جاتا، اس کا مفہوم علم کا دریا ہے اور علم دینے والے بھگوان شیو ہیں۔''

انہوں نے مزید کہا کہ ''اس تعلق سے محکمہ آثار قدیمہ سروے کر رہا ہے اور عدالت اپنا کام انجام دے رہی ہے۔ انہوں نے کہا کہ 'اس وقت ہمارے ملک میں ایک مضبوط وزیر اعظم اور وزیر داخلہ ہیں، اس کی وجہ سے انہیں یقین ہے کہ ہندوؤں کے ساتھ انصاف ہوگا۔''

انہوں نے کہا کہ ''گیان واپی کے ساتھ مسجد کو کیوں شامل کیا گیا؟ ان کا ماننا ہے کہ جس طرح ایودھیا اور رام مندر کو ہندو مذہبی مقام کے طور شان و شوکت حاصل ہوئی ہے اسی طرح کی شان و شوکت گیان واپی کو بھی ملی گی۔''