ہریانہ حکومت کے سو دن مکمل، اپوزیشن کا حملہ

نائب اپوزیشن رہنما آفتاب احمد نے پریس کانفرنس کے دوران کہا کہ ریاست میں سودن قبل دومختلف نظریے کی حامل سیاسی پارٹیوں نے حکومت سازی کی تھی اور امکان کے مطابق ہی یہ بے میل کا اتحاد ناکام نظر آ رہا ہے اور یہی وجہ ہے کہ یہ حکومت ہرمحاذ پر ناکام ہے۔

ریاست ہریانہ میں اتحاد کی حکومت نے سو دن مکمل کر لیے ہیں، اس سے متعلق ہریانہ کے نائب اپوزیشن رہنما رکن اسمبلی آفتاب احمد نے پریس کانفرنس کے دوران حکومت پر تنقید کرتے ہوئے کہا کہ سودن کے بعد بھی ہریانہ کی حکومت کوئی کام نہیں کر پائی ہے۔

انہوں نے پریس کانفرنس کے دوران کہا کہ ریاست میں سو دن پہلے الگ الگ نظریے کی حامل دو سیاسی پارٹیوں نے حکومت سازی کی تھی۔ یہاں تک کہ حکومت نے اب تک کامن منیمم پروگرام تک جاری نہیں کیا۔

انہوں نے کہا کی بی جے پی نے وعدہ کیا تھا کہ ترقی اور روزگار کی وزارت قائم ہوگی، پانچ سوکروڑ روپے خرچ کرکے 25 لاکھ نوجوانوں کو روزگار ملے گا اور بزرگوں کی پینشن تین ہزار روپے کی جائے گی ایسے بہت سے وعدے تھے لیکن حکومت نے ایک بھی وعدہ پورا نہیں کیا۔

رکن اسمبلی آفتاب احمد نے مزید کہا کہ وزیراعلی منوہر لال سے ضلع کے لیے پانی، میڈیکل کالج کے حالات میں سدھار، ضلع میں دفعہ 144 ہٹانے کے لیے کئی بار ملاقات کی ہے لیکن نتیجہ صفر رہا۔ انہوں نے مزید کہا میوات سے کسی طرح کی جانبداری کو وہ کبھی برداشت نہیں کریں گے اور مسلسل محنت کرتے رہیں۔