بی ایس ایف نے سرحد پر اسمگلنگ کی کوشش کو ناکام بنادیا، ایک گرفتار

بی ایس ایف اہلکاروں نے بدھ کی رات دیر گئے بھارت - پاک سرحد پر مشکوک نقل و حرکت کے بعد فائرنگ کی، فائرنگ کے بعد دو افراد فرار ہوگئے جب کہ زخمی ہوئے شخص کو حراست میں لے لیا گیا۔

بارڈر سکیورٹی فورس (بی ایس ایف) کے اہلکاروں نے ریاست پنجاب کے فیروز پورہ میں بدھ کی رات تین پاکستانی منشیات اسمگلروں کو ملک میں داخل ہونے سے روک دیا۔ سرحد پر مشکوک نقل و حرکت دیکھ کر بی ایس ایف اہلکاروں نے اسمگلروں پر فائرنگ کی۔

فائرنگ کے سبب ایک شخص کی بائیں ران پر چوٹ لگی جب کہ باقی دو افراد پاکستان کی طرف لوٹنے میں کامیاب ہوگئے۔ بی ایس ایف اہلکاروں نے حراست میں لیے گئے اسمگلر سے دو منشیات کے پیکٹ بھی برآمد کیے۔

موصولہ معلومات کے مطابق پاکستانی منشیات اسمگلر فیروزپور، پنجاب میں بی او پی ستپال چوکی کے ذریعے بھارتی حدود میں داخل ہونے کی کوشش کررہے تھے۔

زخمی شخص کو گرفتار کرکے نازک حالت میں پنجاب پولیس کے حوالے کردیا گیا جو اس وقت فیروز پور کے سول ہسپتال میں زیر علاج ہے۔

ایس ایچ او فیروز پور چرنجیت سنگھ رندھوا نے گرفتار کیے گئے اسمگلر کی شناخت ارشد کے طور پر کی ہے جو پاکستان کے قصور شہر کے ضلع پٹو کالا کا رہائشی ہے۔

پولیس افسر نے مزید کہا کہ معاملے کی باریک بینی سے تحقیقات کی جارہی ہیں۔