مدھیہ پردیش: سوشل میڈیا کے سبب 43 برس بعد اپنوں سے ملاقات

مدھیہ پردیش کے دموہ ضلع میں 43 برس قبل اپنوں سے بچھڑنے کے بعد ایک معمر خاتون سوشل میڈیا کے سبب اپنوں کے پاس امراوتی پہنچ گئی ہیں، یہ خاتون ہندو مذہب کی پیروکار تھیں جن کی 43 برسوں تک ایک مسلم خاندان دیکھ بھال کر رہا تھا۔

ریاست مدھیہ پردیش کے دموہ ضلع کے نور خان کو 43 برس قبل جنگل میں ایک بوڑھی خاتون ملیں جنہیں وہ اپنے گھر لے آئے اور انہیں اپنے گھر کا فرد بنا لیا لیکن سوشل میڈیا کی وجہ سے 43 برس قبل اپنوں سے بچھڑنے والی خاتون آج اپنوں کے پاس امراوتی پہنچ گئی ہیں۔

نور خان نے جب اس معمر خاتون کو جنگل میں پایا تھا تو اس وقت انہیں اپنے گھر کا پتہ نہیں معلوم تھا جس کے بعد نور خان اس خاتون کو اپنے گھر لے آئے اور اپنوں کی طرح انکی بھی دیکھ بھال شروع کردی، نور خان کے انتقال کے بعد ان کے بیٹے اسرار خان نے یہ ذمہ داری سنبھالی اور انہیں کسی قسم کی تکلیف نہیں پہنچنے دی۔

ایک دن سوشل میڈیا پر اسرار نے دادی سے کچھ سوالات کرتے ہوئے ایک ویڈیو اپ لوڈ کردیا جسے دیکھ کر دادی کے کنبے والے دموہ پہنچ گئے اور انہیں اپنے ساتھ گھر لے کر چلے گئے۔

اس خاتون کا نام پنچو بائی بتایا جارہا ہے اور 43 برس بعد دادی کے گھر لوٹنے سے انکے گھر والے کافی خوش ہیں۔

نیز انہوں نے مسلم خاندان کی اتنے برسوں تک دادی کی دیکھ بھال کرنے پر ان کا شکریہ ادا کیا۔ پرتھوی کمار شنڈے اور ان کے اہل خانہ نے دادی کے گھر واپس آنے پر خوشی کا اظہار کیا ہے۔