ریاست مدھیہ پردیش کے دارالحکومت بھوپال میں مساجد کمیٹی دارالقضاء کے زیر اہتمام ہر سال کی طرح اس سال بھی صدقہ فطر اور زکوۃ کا میزان طے کیا گیا ۔
اس کے تحت ہر صاحب نصاب پر اپنی یا اپنے نابالغ اولاد کی طرف سے ایک کلو 33 گرام گیہوں یا اس کی موجودہ قیمت 50 روپے کی گئی ہے اور اگر کشمش یا کھجور سے صدقہ فطر نکالنا چاہے تو 3 کلو 266 گرام یا اس کی قیمت ادا کریں۔
زکوۃ کا نصاب چاندی سے ساڑھے 52 تولہ یعنی 612 گرام چاندی یا اس کی موجودہ قیمت تقریبا بیالیس ہزار روپے ہوتی ہے۔
اس موقع پر شہر قاضی سید مشتاق علی ندوی نے اپنے پیغام میں صدقہ فطر اور زکوۃ کی لازمی ادائیگی کے تعلق سے لوگوں کو آگاہ کیا۔
انہوں نے کہا کہ ملک میں اور ہمارے صوبے اور شہر میں کورونا کی نئی لہر نے لوگوں کو پریشان کر رکھا ہے، تمام ہی اہل ثروت حضرات سے اپیل ہے کہ وہ موجودہ حالات میں زکوٰۃ نکالنے کا خوب اہتمام کرے۔
انہوں نے کہا لاک ڈاؤن چل رہا ہے تو صاحب استطاعت سے یہ اپیل ہے کہ اپنے پڑوسیوں کا بھی خیال رکھیں ۔اور خاص طور سے کہا کہ اس وقت اسپتالوں میں بہت بھیڑ لگی ہوئی ہے۔کوئی اسپتال خالی نہیں ہیں تمام صاحب اسطاعت حضرات سے یہ اپیل ہے کہ اسپتالوں کے اندر جائے وہاں جو بھی ضرورت مند ہے ان کی تمام ضروریات کا پورا خیال رکھیں۔
انہوں نے کہا یہ مہینہ غم خواری کا ہے ۔حضور پاک صلی اللہ علیہ وسلم کا جو نمونہ تھا کہ اس مہینے کے اندر آپ تیز ہواؤں سے زیادہ زکوۃ نکالا کرتے تھے تو ہمیں بھی اس کا اہتمام زوروں سے کرنا چاہیے ۔
