ڈاکٹر بشیر بدر کی اہلیہ نے پی ایچ ڈی کی ڈگری دلائی

ڈاکٹر بشیر بدر اور ان کے اہل خانہ نے پی ایچ ڈی کی ڈگری ملنے پر خوشی کا اظہار کیا- بشیر بدر کو علی گڑھ مسلم یونیورسٹی سے 47 سال بعد پی ایچ ڈی کی ڈگری ملی ہے۔

اردو کے مشہور شاعر پدم شری ڈاکٹر بشیر بدر کے اہل خانہ مدھیہ پردیش میں مقیم ہیں۔ ڈاکٹر بشیر بدر نے 1973 میں علی گڑھ مسلم یونیورسٹی سے پی ایچ ڈی مکمل کی تھی۔ ڈاکٹر بشیر بدر پی ایچ ڈی کرنے کے بعد ملازمت کی مصروفیات اور مشاعروں میں شرکت کی وجہ سے پی ایچ ڈی کی ڈگری کے لئے یونیورسٹی میں درخواست نہیں دے سکے تھے۔ اس کے بعد ڈاکٹر بشیر بدر ڈیمینشیا بیماری کے شکار ہو گئے۔

ڈاکٹر بشیر کی اہلیہ راحت بدر نے ان کی پی ایچ ڈی کی ڈگری حاصل کرنے کے لئے علی گڑھ مسلم یونیورسٹی میں درخواست دی اور پھر تمام کوششوں کے بعد انہیں علی گڑھ مسلم یونیورسٹی سے پی ایچ ڈی کی ڈگری موصول ہوئی- جس پر بشیر بدر کے اہلخانہ اور خود بشیر بدر نے ڈگری کو دیکھ کر خوشی کا اظہار کیا۔

واضح رہے کہ ڈاکٹر بشیر بدر نے پی ایچ ڈی سے قبل علی گڑھ مسلم یونیورسٹی سے ایم اے کی ڈگری 1969ء میں حاصل کی تھی۔ یہاں خاص بات یہ ہے کہ ایم اے کے نصاب میں اس وقت علی گڑھ مسلم یونیورسٹی میں خود بشیر بدر کی نظموں اور غزلوں کو پڑھایا جاتا تھا- خود ڈاکٹر بشیر بدر نے ایم اے کے نصاب میں اپنی غزلوں اور نظموں کو پڑھا تھا-