بھوپال میں دس دن کا مکمل لاک ڈاؤن کرنے کا فیصلہ

مدھیہ پردیش کے وزیر داخلہ نروتم مشرا نے کہا کہ بھوپال میں کورونا متاثرین میں تشویشناک اضافے کے باعث 25 جولائی سے تین اگست تک مکمل لاک ڈاؤن کرنے کا فیصلہ کیا گیا ہے۔

ریاست مدھیہ پردیش کے دارالحکومت بھوپال میں کورونا متاثرین کے کیسز میں مسلسل اضافے کی وجہ سے بھوپال میں 25 جولائی کی صبح سے 10 دنوں تک مکمل لاک ڈاؤن نافذ کرنے کا فیصکہ کیا گیا ہے۔

ریاست کے وزیر داخلہ ڈاکٹر نروتم مشرا نے صحافیوں سے گفتگو کے دوران کہا کہ 23 اور 24 جولائی کو لوگوں کو سہولت دی گئی ہے کہ وہ کورونا سے متعلق اقدامات کا خیال رکھ کر ضروری اشیاء کی خرید و فروخت کرلیں اور اگر کسی کو بھوپال سے باہر جانا ہے یا آنا ہے تو وہ آجا سکتے ہیں، اس کے بعد ہنگامی خدمات کو چھوڑ کر کسی بھی طرح کی رعایت نہیں دی جائے گی۔

انھوں نے کہا کہ 24 جولائی کی رات یعنی 25 جولائی کی صبح سے 3 اگست کی رات تک مکمل لاک ڈاؤن جاری رہے گا، انہوں نے کہا دس دنوں تک بھوپال کی شہر کی سرحدیں بھی سیل رہے گی۔

وزیر داخلہ نےمزید کہا کہ اس دوران تمام لوگ اپنے تہواروں کو اپنے اپنے گھروں پر ہی منائیں، جبکہ لاک ڈاؤن کے دوران دوا اور سبزی ملینگی لیکن بازار مکمل طور سے بند رہیں گے۔

واضح رہے کہ آج بھوپال میں 153 کورونا مثبت مریض پائے گئے ہیں، اس لیے حکومت اور انتظامیہ نے پوری صورتحال کا جائزہ لینے کے بعد لاک ڈاؤن نافذ کرنے کا فیصلہ کیا ہے۔