رام مندر چندے پر کانگریسی رہنما کا بی جے پی پر سنگین الزام

کانگریس کے رکن اسمبلی کانتی لال بھوریا نے بی جے پی پر شدید تنقید کرتے ہوئے الزام لگایا کہ 'بھارتیہ جنتا پارٹی رام مندر کے چندے کی رقم کا غبن کر رہی ہے۔' وہیں، مدھیہ پردیش کے وزیر داخلہ ڈاکٹر نروتم مشرا نے رد عمل دیتے ہوئے کہا کہ 'کانتی لال بھوریا نے رام بھکتوں کی توہین کی ہے۔'

مدھیہ پردیش میں کانگریس رہنما کانتی لال بھوریا نے بی جے پی پر شدید تنقید کرتے ہوئے کہا کہ 'بی جے پی چندے کی رقم کا غبن کررہی ہے۔' ان کے اس بیان پر ریاست کی سیاست تیز ہوگئی ہے۔

کانگریسی رہنما کے بیان پر تبصرہ کرتے ہوئے مدھیہ پردیش کے وزیر داخلہ ڈاکٹر نروتم مشرا نے کہا کہ 'کانتی لال بھوریا نے رام بھکتوں کی توہین کی ہے۔'

پروٹیم اسپیکر رامیشور شرما نے کہا کہ 'ان کا یہ بیان بدبختانہ ہے۔ میں سمجھتا ہوں بھوریا جیسے سینئر لیڈر کو اس طرح کا بیان نہیں دینا چاہیے۔ رام بھکتوں کے بارے میں اور رام کے لیے کام کرنے والے لوگوں کو اس طرح سے بدنام نہیں کرنا چاہیے۔ یہ کام پاکستان کا ہے۔'

نروتم مشرا نے کہا کہ 'رام مندر تعمیر کے لیے چندے کی رقم پر بھوریا کا بیان غلط سوچ کی علامت ہے۔'

دراصل کانگریس کے سینئر لیڈر اور ضلع جھابوا سے رکن اسمبلی کانتی لال بھوریا نے کہا کہ 'گزشتہ کچھ برسوں میں بھارتیہ جنتا پارٹی نے رام مندر کے نام پر کروڑوں کا چندہ لیا، لیکن وہ پیسہ کہاں گیا؟'

کانتی لال بھوریا نے کہا کہ 'دن میں یہ رام مندر کے نام پر چندہ کرتے ہیں اور اسی پیسے سے رات میں شراب پیتے ہیں۔ اس سے پہلے کیے گئے چندے کا کوئی حساب نہیں ہے۔'