ریاست کرناٹک کے ضلع یادگیر میں حضرت صوفی سرمست اسلامک اسٹڈی سرکل کے زیراہتمام شہر کے صبا کالج میں جلسہ یوم سرسید کا انعقاد عمل میں آیا۔
اس موقع پر جانثار کوثر چیئرمین صبا کالج نے شال پوشی و گلپوشی کے بجائے کتابوں کا تحفہ دینے کی تحریک کو آگے بڑھاتے ہوئے ممتاز شاعر جیلانی شاہد مرحوم کے 3 شعری مجموعے کلام کا تحفہ پیش کیا۔
اس موقع پرقاضی الدین صدیقی نے سرسید احمد خان کی حیات و خدمات پر تفصیلی روشنی ڈالتے ہوئے کہا کہ سرسید نے مغلیہ سلطنت کے زوال سے مایوس اور انگریزی حکومت کے ظلم کا شکار مسلمانوں میں حالات کا مقابلہ کرنے کا شعور بیدار کیا۔
اجلاس سے خطاب کرتے ہوئے عزیزاللہ سرمست نے کہا کہ مسلمانوں کو عصری تعلیم میں سبقت حاصل کرنے کی ضرورت ہے انہوں نے طلباء طالبات پر زور دیا کہ وہ کبھی احساس کمتری کا شکار نہ ہوں بلکہ اپنی کمزوریوں پر قابو پاکر انہیں دور کرنے کی کوشش کریں۔
اس موقع پر جانثار کوثر چیئرمین صبا کالج، تجمل حسین، صدر ستیہ وادی ہیومن رائٹس، عنایت الرحمٰن سابق رکن بلدیہ یادگیر نے بطور مہمان شرکت کی جب کہ سید ساجد حیات نے اجلاس کی نظامت کی۔