نریندر مودی اسٹیڈیم کا نام تبدیل کیا جائے، کانگریس رہنما کا مطالبہ

چند دنوں قبل مرکزی حکومت کی جانب سے راجیو گاندھی کھیل رتن ایوارڈ کا نام تبدیل کرنے کا فیصلہ کیا گیا تھا۔ کانگریس پارٹی کے رہنماؤں کی جانب سے حکومت کے اس فیصلہ کی مذمت کی جا رہی ہے-

ریاست کرناٹک کے ضلع یادگیر کےکانگریس پارٹی کے شعبہ اقلیت کے رہنما امتیازالدین نے جمعہ کو سابق وزیر اعظم راجیو گاندھی کے یوم پیدائش کے موقع پر منعقدہ ایک تقریب میں شرکت کی۔

اس موقع پر انہوں نے کہا کہ بطور وزیر اعظم راجیو گاندھی نے ملک کے لیے جو خدمات انجام دی ہیں وہ کسی سے مخفی نہیں ہے۔ انہوں نے ملک کے لیے بے شمار خدمات انجام دی ہیں۔

انہوں نے کہا کہ مرکزی حکومت کی جانب سے کھلاڑیوں کو دیے جانے والا ایوارڈراجیو گاندھی کھیل رتن ایوارڈ کا نام تبدیل کرنا نامناسب ہے ۔اور وہ اس فیصلہ کی مذمت کرتے ہیں۔

انہوں نے کہا کہ مرکزی حکومت نے راجیو گاندھی کھیل رتن ایوارڈ کا نام تبدیل کرنے کا فیصلہ کیا ہے تو پھر گجرات میں واقع نریندر مودی کے نام سے موسوم اسٹیڈیم کا نام بھی تبدیل کیا جائے۔ انہوں نے کہا کہ دہلی میں واقع ارون جیٹلی اسٹیڈیم کا نام تبدیل کیا جائے۔

امتیازالدین نے مزید کہا کہ ملک بھرکے کانگریس کارکنان کو چاہیے کہ وہ راجیو گاندھی کھیل رتن ایوارڈ کے نام تبدیل کیے جانے کے خلاف احتجاج کریں۔