شکایات کے ازالے کے لیے وقف عدالت قائم کی جائے: سماجی کارکنان

کرناٹک وقف بورڈ کارگزاری میں تساہل برتنے اور لاپرواہی کے لئے مشہور ہے۔ وقف بورڈ میں اوقافی جائیدادوں سے متعلق شکایات کے ازالے کا کوئی نظم نہیں ہے۔ لہٰذا ریاست کے مختلف اضلاع سے شکایت کنندہ سالوں تک وقف بورڈ کے چکر کاٹنے پر مجبور ہیں۔

بنگلور: اس سلسلے میں وقف پروٹیکشن ایکشن کمیٹی کے سکریٹری محمد الیاس کہتے ہیں کہ حکومت کی جانب سے کئی محکموں میں شکایات سننے اور ان کے ازالے کے لئے "عدالتیں" بنائی جاتی ہیں تو "وقف عدالت" کا قیام کیوں نہ کیا جائے؟

جماعت اسلامی کرناٹک کے نائب صدر مولانا یوسف کنہی کہتے ہیں کہ اثر و رسوخ رکھنے والے بڑے لوگوں اور سیاستدانوں کا اوقافی جائیدادوں پر قبضہ ہے لیکن ان جائیدادوں سے ہورہی آمدنی کا فائدہ ملت کے مستحقین کو نہیں مل پارہا ہے۔

لہٰذا وقف بورڈ کو چاہیے کہ عوامی سطح پر ہر ضلع میں ایک وقف عدالت کا قیام عمل میں لائے تاکہ اوقافی جائیدادوں کے مسائل کے متعلق کسی بھی دباؤ سے آزاد ہوکر سماعت ہو اور انہیں حل کرنے میں آسانی پیدا ہو۔