یادگیر: گئو کشی مخالف بل کی مذمت

ریاست کرناٹک میں گئو کشی مخالف بل کو منظوری دیے جانے کی مذمت کرتے ہوئے سوشل ڈیموکریٹک پارٹی آف انڈیا کے صدر نے حکمراں جماعت سمیت 'نام نہاد' سیکولر پارٹیوں کو بھی تنقید کا نشانہ بنایا۔

ریاست کرناٹک کے ضلع یادگیر میں سوشل ڈیموکریٹک پارٹی آف انڈیا کے صدر نے میڈیا سے گفتگو کرتے ہوئے کہا کہ 'ریاستی حکومت نے گئو کشی مخالف بل منظور کر کے یہ بتا دیا ہے کہ وہ کسانوں اور غریبوں کے ساتھ نہیں ہے۔'

انہوں نے کہا کہ 'صرف نام کی سیکولر پارٹیوں سے اب مسلمانوں، دلتوں اور کسانوں کو ہوشیار رہنا ہوگا۔'

پارٹی کے صدر سید اسحاق خالد نے مزید کہا کہ ان کی پارٹی پوری ریاست میں اس بل کے خلاف احتجاج کرے گی اور اس بل کے خلاف قانونی کارروائی بھی کی جائے گی۔

انہوں نے دعویٰ کیا کہ اس بل سے سب سے زیادہ پریشان کسان ہوں گے جو پہلے ہی مختلف کسان مخالف قوانین کی وجہ سے پریشان ہیں۔

سید اسحاق کے مطابق 'ریاست کرناٹک کی حکومت نے اس بل کو منظور کروا کر لوگوں کی پریشانیوں میں اضافہ کیا ہے، اس بل سے کسی کا بھی بھلا نہیں ہونے والا ہے۔'

انہوں نے بل کے حوالے سے سیکولر پارٹیوں کو بھی تنقید کا نشانہ بناتے ہوئے عوام سے 'نام نہاد سیکولر پارٹیوں سے ہوشیار' رہنے کی اپیل کی۔