کرناٹک: لاک ڈاؤن کے دوران صرف 4 گھنٹے کی مہلت ناکافی

حکومت کرناٹک نے گذشتہ 2 ہفتے سے ویکینڈ لاک ڈاؤن اور نائٹ کرفیو نافذ کیا تھا لیکن جب اس سے بھی بات بنتی نظر نہیں آئی تو 14 دنوں کا مکمل لاک ڈاؤن نافذ کر دیا ہے۔

ریاست کرناٹک میں حکومت نے کووڈ وبا کو ختم کرنے کے لیے 14 دنوں کا سخت لاک ڈاؤن نافذ کیا ہے اور اس دوران ضروری اشیاء کی خرید و فروخت کے لئے صبح 6 بجے سے 10 بجے دن تک، 4 گھنٹوں کی مہلت دی ہے۔ اس تعلق سے ای ٹی وی بھارت نے شہر کی کے آر مارکٹ کے وینڈرس سے بات کی جو لاک ڈاؤن کے سبب کافی پریشانیوں سے دوچار ہیں۔

ٹھیلے والوں کا کہنا ہے کہ لاک ڈاؤن سے انہیں بڑی دشواریاں ہو رہی ہیں، ان کے سامان کی فروخت بمشکل 10 فیصد ہی ہوپارہی ہے جس سے انہیں کافی نقصان ہو رہا ہے۔

دکانداروں کا کہنا ہےکہ 'اس مہلک وبا سے بچاؤ کے لیے لاک ڈاؤن ہی واحد حل نہیں ہونا چاہیئے بلکہ حکومت کو اس سے مختلف کوئی راہ نکالنی چاہئی جس سے کورونا پر بھی قابو پایا جاسکے اور کسی کا نقصان بھی نہ ہو۔'

یاد رہے کہ کرناٹک حکومت نے گذشتہ 2 ہفتے سے ویکینڈ لاک ڈاؤن اور نائٹ کرفیو نافذ کیا تھا لیکن جب اس سے بھی بات بنتی نظر نہیں آئی تو اسے کنٹرول کرنے کے لئے 14 دنوں کا مکمل لاک ڈاؤن نافذ کیا ہے۔