نئی صنعتیں قائم کرنے کے لیے جگہ مختص کرنے کا مطالبہ

کرناٹک کے شہر یادگیر جس کو ضلع کا درجہ ملے بارہ سال کا عرصہ ہو گیا ہے مگر یہاں کے مسائل آج بھی جوں کے توں برقرار ہیں۔ روزگار یہاں کا سب سے بڑا مسئلہ ہے۔

روزگار نہ ملنے کی وجہ سے یہاں کے لوگ اکثر حیدرآباد، ممبئی اور دیگر مقامات پر جا کر کام کرنے پر مجبور ہیں۔ دوسری جانب سرمایہ دار طبقہ اپنے کاروبار سے متعلق کافی فکر مند ہے۔

رائس مِل ایسوسی ایشن کے صدر لائق حسین بادل نے ای ٹی وی بھارت سے چھوٹی صنعتوں کے قیام میں درپیش مسائل پر گفتگو کرتے ہوئے کہا کہ تیس سال پہلے 22 ایکڑ کی جگہ صنعتوں کے قیام کے لیے دی گئی تھی، جہاں آج کئی انڈسٹریز قائم ہو بھی چکی ہیں۔ اب یہاں پر مزید نئی صنعت قائم کرنے کے لیے جگہ نہیں ہے۔ جس کی وجہ سے نئے کاروبار کرنے والوں کو کافی پریشانی ہو رہی ہے۔

انہوں نے مزید کہا کہ 10 سال قبل یادگیر میں کرناٹک انڈسٹریز ڈیولپمنٹ بورڈ کی جانب سے نئی انڈسٹریز قائم کرنے کے لیے سروے کیا گیا تھا۔ مگر آج تک انڈسٹریز کے لیے جگہ مختص نہیں کی گئی۔

انہوں نے کہا کہ ہم نے کرناٹک اسمال اسکیل انڈسٹریز اسوسیئشن سے مطالبہ کیا ہے کہ وہ ریاستی حکومت سے ضلع یادگیر میں چھوٹی صنعتیں قائم کرنے کے لیے جلد از جلد جگہ مختص کرے۔