گلبرگہ: یوم عاشورہ کے موقع پر سنتراش واڑی مسجد میں افطار و طعام کا اہتمام

کرناٹک میں گلبرگہ کی سنتراش واڑی مسجد میں یوم عاشورہ کے موقع پر عام وخاص روزہ افطاری و طعام کا اہتمام کیا گیا جس میں سینکڑوں مسلمانوں نے شرکت کی۔

گلبرگہ کے سنتراش واڑی مسجد میں 10 محرم الحرام کو مقامی نوجوانوں کی جانب سے عاشورہ کا روزہ رہنے والوں کے لیے افطار اور طعام کا معقول انتظام کیا گیا۔ اس موقع پر سینکڑوں روزہ داروں نے افطار سے قبل ملک میں امن و امان اور کورونا وبا کے خاتمہ کے لیے دعا کی۔

سنتراش واڑی نوجوان تنطیم کے ذمہ دار سلیم نے بتایا کہ ہر سال کی طرح اس برس بھی یوم عاشورہ کے موقع پر مسجد میں خصوصی عبادات کا اہتمام اور روزہ داروں کے لیے افطار و طعام کا انتظام کیا گیا۔ انہوں نے کہا کہ اس موقع پر کورونا وبا کے خاتمہ کے لیے بھی دعا کی گئی۔

انہوں نے کہا کہ یوم عاشورہ کے موقع پر نواسۂ رسولﷺ حضرت امام حسینؓ کی شہادت کو یاد کیا گیا اور خصوصی عبادات و دعاؤں کا اہتمام کیا گیا۔ انہوں نے کہا کہ شہادت حسینؓ سے حق اور سچائی کا درس ملتا ہے۔