پردھان منتری ماترو وندنا یوجنا سے استفادہ کی اپیل

کرناٹک کے ضلع یادگیر میں محکمہ خواتین و اطفال بہبود کے تحت وارڈ نمبر 13 کے آنگن واڑی سنٹر میں ایک اجلاس منعقد ہوا جس میں پردھان منتری ماترو وندنا یوجنا کے تحت حاملہ خواتین کو ملنے والی سہولیات سے متعلق تفصیلات پیش کی گئیں۔

اس موقع پر وارڈ نمبر 13 کے آنگن واڑی سنٹر کی ٹیچر ناظمہ بیگم نے بتایا کہ پردھان منتری ماترو وندنا یوجنا کے تحت محکمہ خواتین و اطفال کی جانب سے حاملہ خواتین کو پانچ ہزار روپے اور ہر ماہ دال، انڈے، دودھ کا پاؤڈر، پھلی، شکر، گڑ، چاول بھی دیئے جاتے ہیں۔

انہوں نے کہا کہ پہلی مرتبہ حاملہ ہونے والی خواتین اس یوجنا سے شہر کے تمام آنگن واڑی پر استفادہ حاصل کرسکتی ہیں۔ انہوں نے خواتین سے اپیل کرتے ہوئے کہا کہ اسکیم سے استفادہ حاصل کرنے کےلیے آدھار کارڈ، بینک اکاؤنٹ کی تفصیلات کو فوری طور پر جمع کروائیں۔