بچوں کو موسمی بیماریوں سے دور رکھنے کے لیے ٹیکہ کاری مہم

ریاست اترپردیش کے ضلع رامپور میں پانچ سال تک کے بچوں کو ہونے والے بیماریوں سے دور رکھنے کے لیے 13 اگست سے ٹیکہ کاری کی مہم شروع کی جائے گی۔ یہ جانکاری آج چیف میڈیکل آفیسر سبودھ کمار شرما نے پریس کانفرنس کا اہتمام کرکے دی۔

اسٹریپٹوکاکس نیومونی کے ذریعہ بچوں میں نیومونیا، دماغی بخار اور کان بہنے جیسی بیماری کے خطرات پیدا ہو جاتے ہیں۔ یہ خطرہ پانچ سال تک کے بچوں میں زیادہ ہوتا ہے۔ اس میں خصوصی طور پر دو برس تک کے بچوں میں زیادہ ہوتا ہے۔

رامپور ضلع کے چیف میڈیکل آفیسر ڈاکٹر سبودھ کمار شرما نے نواب گیٹ واقع اپنے دفتر میں پریس کانفرنس کا اہتمام کرکے میڈیا نمائندوں کو بتایا کہ بچے اس قسم کی بیماریوں سے محفوظ رہیں، اس کے لیے حکومت ہند نے ہدایات جاری کی ہیں کہ پورے ملک میں مرحلہ وار نیوموکوکل کنجوکویٹ ویکسین (پی سی وی) کا مسلسل ٹیکہ کاری کے لیے نظم کیا جائے۔

انہوں نے کہا کہ اترپردیش کے 56 اضلاع میں 10 اگست سے ٹیکہ کاری کا آغاز کیا جا چکا ہے۔ سی ایم او نے بتایا کہ 13 اگست سے رامپور میں بھی باقائدہ اس آغاز کر دیا جائے گا۔