بریلی میں لوگوں نے ایک بار پھر فرقہ وارانہ فضا کا جواب مذہبی اتحاد سے دیا ہے۔ یہاں لوگوں نے مقتول پردھان کی اہلیہ کو بھاری ووٹوں سے فاتح بناکر ثابت کر دیا ہے کہ تشدد اور فرقہ واریت کا جوش عارضی ہوتا ہے. باہمی بھائی چارہ مستقل ہوتا ہے۔ ضلع میں فرقہ وارنہ تناؤ میں جس پردھان کو قتل کیا گیا تھا، آج اُسی گاؤں کی ہندو اکثریت امن پسند عوام نے مقتول پردھان کی اہلیہ کو بھاری ووٹوں سے فاتح بنایا ہے۔
بریلی ضلع کے 'کیارا' بلاک کے گاؤں 'لکھورا پرگواں' میں گزشتہ 20 مئی کو نومنتخب پردھان حافظ محمد اسحاق رضوی کو گولیاں مارکر قتل کر دیا گیا تھا۔ اُنہوں نے دو مئی کو سابق پردھان موہر سنگھ کو صرف 52 ووٹوں سے شکست دی تھی اور گاؤں میں کوئی مسلم تیس برس بعد پردھان منتخب ہوا تھا۔ موہر سنگھ کو یہ شکست برداشت نہیں ہوئی اور اُس نے سُپاری کِلرس کے ذریعے پردھان منتخب ہونے کے محض 18 دن بعد یعنی 20 مئی کو پردھان حافظ محمد اسحاق رضوی کا قتل کرا دیا۔ وہ اپنی اہلیہ سکینہ کی دوا لیکر شہر سے واپس گاؤں لوٹ رہے تھے۔ گھر کے راستہ میں قتل کی اس واردات میں اہلیہ سکینہ بھی زخمی ہو گئیں تھیں اور وہ پورے واقعہ کی چشمدید گواہ بھی بنی۔ بہرحال پولس نے سکینہ کی تحریر کی بنیاد پر مہر سنگھ سمیت کل آٹھ ملزمان کو گرفتار کرکے جیل بھیج دیا۔ یہ سبھی آٹھ ملزمان ابھی جیل میں ہیں۔
پردھان حافظ محمد اسحاق رضوی کے قتل کی وجہ سے سیٹ خالی ہو گئی تو ضلع انتظامیہ نے 'مِڈ ٹرم پول' کرانے کے لیئے ووٹنگ کی تاریخ 12 جون طے کر دی۔ مقتول پردھان کی اہلیہ سکینہ نے امیدوار کے طور پر اپنا پرچہ داخل کر دیا۔ ووٹنگ کی تاریخ یعنی 12 جون کو گاؤں لکھورا پرگواں میں 1410 ووٹ ڈالے گئے۔ آج ووٹوں کی گنتی کی گئی تو مقتول پردھان حافظ اسحاق رضوی کی اہلیہ سکینہ بی نے اپنے مدمقابل امید وار کو 562 ووٹوں سے زبردست شکست دی۔ سکینہ بی کو کل 884 ووٹ ملے، جبکہ اُن کے مدمقابل امیدوار امرناتھ کو 322 ووٹ ملے۔