'اگر اعظم خاں کی سرکار ہوتی تو میرا بیٹا نہیں مرتا'

ریاست اترپردیش کے رامپور میں ہوئے دو روز قبل بی جے پی لیڈر انوراگ شرما کے قتل کی واردات کی شکایت کرتے ہوئے ان کی والدہ نے آئی جی سے کہا کہ اگر اعظم خاں ہوتے تو ان کا بیٹا نہیں مارا جاتا۔ انہوں نے کہا کہ محمد اعظم خاں کی سرکار میں میرا بیٹا محفوظ تھا۔

گذشتہ دو روز قبل رامپور کے تھانہ سول لائنس علاقے میں بی جے پی لیڈر انوراگ شرما کو نامعلوم افراد نے گولی مار کر قتل کر دیا تھا۔ اطلاع ملنے پر آئی جی مرادآباد رمت شرما، رامپور کے پولیس کپتان شگن گوتم کے ساتھ موقع واردات پر پہنچے اور معائنہ کے بعد مقتول کے اہل خانہ سے بھی ملاقات کی۔ انہوں نے یقین دلایا کہ جلد ہی قاتلوں کا پردہ فاش کیا جائے گا۔

اس موقع پر مقتول انوراگ شرما کی والدہ نے اپنا درد بیان کرتے ہوئے کہا کہ محمد اعظم خاں کی حکومت میں میرا بیٹا پوری طرح محفوظ تھا اور آج بی جے پی کی سرکار میں قانون نام کی کوئی چیز نہیں ہے۔ ہر طرف غنڈہ راج ہے۔