نابالغ لڑکی سے اجتماعی عصمت دری کے سات دن بعد درج کی گئی ایف آئی آر

ریاست اترپردیش کے ضلع رامپور کے شہزاد نگر پولیس اسٹیشن کے گاؤں تمڑیا میں 7 دن پہلے نابالغ لڑکی کے ساتھ اجتماعی عصمت دری کا معاملہ سامنے آیا تھا۔ متاثرہ مسلسل اپنی شکایت پولیس سے کر رہی تھی لیکن ابھی تک اس کی ایف آئی آر درج نہیں ہوئی تھی۔

متاثرہ لڑکی اور اس کے والد جب ضلع انتظامیہ کے پاس اپنی شکایت لے کر گئے تو پولیس نے فوری اس کی ایف آئی آر درج کرکے کارروائی کی یقین دہانی کرائی۔

رامپور کے شہزاد نگر تھانہ علاقے میں تقریباً 7 روز قبل ہوئی نابالغ لڑکی کے ساتھ اجتماعی جنسی زیادتی کے معاملے میں متاثرہ اور اس کے اہل خانہ کے بار بار پولیس انتظامیہ کے چکر لگانے کے بعد پولیس نے آخر کار تین نامعلوم ملزمان کے خلاف مقدمہ درج کر لیا ہے۔

اطلاعات کے مطابق واقعہ 13 جنوری کی رات کا تھانہ شہزاد نگر علاقے کا ہے۔ پہلے تو پولیس نے معاملے کو مشکوک مانتے ہوئے متاثرہ کے اہل خانہ کی جانب سے مقدمہ درج نہیں کیا لیکن جب متاثرہ اور اس کے اہل خانہ نے ضلع انتظامیہ کے چکر لگانے شروع کئے تو پولیس نے اپنی عزت بچانے کے لیے تقریباً 7 دن بعد مقدمہ درج کر لیا ہے۔ لاپرواہی کا اندازہ اس بات سے لگایا جا سکتا ہے کہ متاثرہ کو طبی جانچ کے لئے اب بھیجا گیا ہے اور اب ملزمان کی تلاش شروع کر دی گئی ہے۔

معاملہ رامپور کے تھانہ شہزاد نگر کا ہے جہاں 13 جنوری کی رات اینٹ بھٹہ پر کام کرنے والے مزدور کی نابالغ بیٹی کے ساتھ اجتماعی جنسی زیادتی کی گئی۔ ملزمین نے متاثرہ کے والد کے ہاتھ باندھ کر طمنچہ کے زور پر اجتماعی جنسی زیادتی کی واردات کو انجام دیا۔ 14 جنوری کی صبح متاثرہ اپنے والد کے ساتھ پولیس اسٹیشن گئی اور اپنے ساتھ ہوئی واردات کی جانکاری دی۔

رامپور کے ایڈیشنل ایس پی ارون کمار سنگھ نے بتایا کہ اس سے پہلے بھی ایک شکایت موصول ہوئی تھی، جس پر فوری طور پر تھانہ انچارج سی او موقع پر گئے تھے۔ جب متاثرہ سے شکایت لکھانے کی بات آئی تھی تو تھانہ پر کیمرے کے سامنے متاثرہ نے اس قسم کی کسی بھی واردات سے انکار کر دیا تھا۔ لیکن اب دوبارہ انہوں نے اس کی شکایت درج کرائی ہے۔