ریاست اترپردیش کے ضلع بریلی میں آل انڈیا تنظیم علماء اسلام کے ذمہ داران نے تریپورہ میں مسلمانوں کے ساتھ ہو رہے نا انصافی اور ان پر چند ہندو تنظیموں کی جانب سے تشدد کئے جانے کے خلاف سخت ناراضگی کا اظہار کیا ہے۔ تنظیم کے جنرل سکریٹری مولانا شہاب الدین رضوی نے کہا کہ تریپورہ مسلمانوں پر مظالم ڈھانے والی حکومت کو برخاست کرکے صدر راج نافذ کیا جانا چاہیے۔
آل انڈیا تنظیم علماء اسلام کے قومی جنرل سکریٹری مولانا شہاب الدین رضوی نے ضلع مجسٹریٹ کو ایک میمورنڈم پیش کیا،جس میں صد جمہوریہ سے تریپورہ میں صدر راج نافذ کرنے کا مطالبہ کیا گیا ہے اور وہاں کی صورتحال پر قابو پانے کے لئے اقدام اٹھانے کی گزارش کی گئی ہے۔
اُنہوں نے کہا کہ تریپورہ میں مسلمانوں کو فرقہ پرست تنظیمیں تشدد کا نشانہ بنا رہی ہیں۔ ایک درجن سے زائد مساجد کو نذر آتش کیا گیا ہے اور مسلمانوں کی درجنوں دکانوں اور مکانوں کو مسمار کیا گیا ہے۔انہوں نے مزیدکہا کہ وہاں کی حکومت اور مقامی پولیس خاموش تماشائی بنی ہوئی ہے۔ فرقہ پرست کو گویا ظلم و تشدد کی آزادی دی گئی ہو۔ مسلمانوں پر ظلم و ستم کے پہاڑ توڑے جارہے ہیں۔جس کی وجہ سے وہاں کی صورتحال ابتر ہے۔
مزید پڑھیں:تریپورہ میں ہوئے فرقہ وارانہ تشدد پر وکلاء کی فیکٹ فائنڈنگ رپورٹ
انہوں نے کہا کہ حکومت کی یہ ذمہ داری ہے کہ ملزمین کے خلاف سنگین دفعات کے تحت مقدمہ درج کرکے سخت قانونی کاروائی کرے۔ اور جن لوگوں کو مالی نقصانات کا سامنا کر نا پڑا ہے انہیں معاوضہ دینے کی ضرورت ہے۔
