New Government Schools in Bareilly: بریلی میں 11 نئے سرکاری اسکولز کا ہوگا آغاز

بریلی ڈویژن میں رہنے والے طلباء کو تعلیم حاصل کرنے کے لیئے دور دراز کے اسکولوں میں جانے کی ضرورت نہیں ہے۔ اس سیشن میں ڈویژن میں 11 اور دو لکھیم پور کھیری سمیت 13 سرکاری اسکول شروع ہوں گے۔ حکومت نے ان اسکولوں کو چلانے کی اجازت بھی دے دی ہے۔ اس وقت ان سکولوں میں بنیادی انتظامات کو حتمی شکل دی جا رہی ہے۔

وزیر اعظم جن وکاس اسکیم کے تحت بریلی میں آٹھ، لکھیم پور کھیری میں دو کے علاوہ بدایوں، پیلی بھیت اور شاہ جہاں پور میں ایک ایک انٹر کالج تیار کیا گیا ہے۔ بریلی میں چلنے والے اسکولوں میں گورنمنٹ انٹر کالج موڑیا جاگیر بہیڑی، گورنمنٹ انٹر کالج برور، گورنمنٹ انٹر کالج بالی پور احمد پور، گورنمنٹ گرلز انٹر کالج پیگا ریچھا، گورنمنٹ گرلز انٹر کالج اونڈلا جاگیر، گورنمنٹ انٹر کالج تورسا پٹّی، گورنمنٹ گرلز انٹر کالج سیتھل اور گورنمنٹ انٹر کالج حافظ گنج شامل ہیں۔

بریلی میں 11 نئے سرکاری اسکول کا ہونے جا رہا ہے آغاز

اتر پردیش حکومت نے ان سرکاری انٹر کالجوں میں 24 عہدے تخلیق کیئے ہیں۔ اس سے دیہی علاقوں کے بچّوں کو بہت فائدہ ہوگا۔ دوسری طرف بدایوں کے وزیر گنج بلاک کے سید پور گاؤں میں گورنمنٹ گرلز انٹر کالج بنایا گیا ہے۔ لکھیمپور کھیری میں گورنمنٹ گرلز انٹر کالج پھول بیہڑ اور گورنمنٹ گرلز انٹر کالج کوکرا میں بنائے گئے ہیں۔ اس کے علاوہ پیلی بھیت میں گورنمنٹ انٹر کالج شیر محمد اور شاہ جہاں پور میں گورنمنٹ انٹر کالج احمد نگر میں تعمیر کیا گیا ہے۔

موجودہ تعلیمی سیشن23۔2022 میں کالج کو منظم طریقے سے چلانے کے لیے عملہ بھی تعینات کر دیا گیا ہے۔ ہر کالج میں 10 لیکچرار، سات اسسٹنٹ ٹیچر، دو جونیئر اسسٹنٹ اور پانچ درجہ چہارم ملازمین کا تقرر کیا گیا ہے۔ کالجوں میں تمام ضروری عہدوں پر تقرر کیا جا چکا ہے، لیکن پرنسپل کے عہدے پر ابھی کوئی تقرر نہیں کیا گیا ہے۔ محکمہ جاتی اطلاعات کے مطابق پرنسپلز کی تقرری رواں ماہ میں کی جائے گی۔ اس سلسلے میں مقامی ہیڈ کوارٹر سے خط و کتابت کے ذریعے تقرری کا مطالبہ کیا گیا ہے۔

بریلی میں 11 نئے سرکاری اسکول کا ہونے جا رہا ہے آغاز

بریلی میں مامور اسسٹنٹ ڈائریکٹر آف ایجوکیشن، ڈاکٹر اجے کمار دیویدی کے مطابق ڈویژن کے تمام اسکولوں میں پرنسپل کے عہدوں کے علاوہ باقی تمام عہدوں کی تخلیق کی گئی ہیں۔ اس کے ساتھ ساتھ اسکولوں میں آخری مرحلے کی تیاریاں جاری ہیں۔ توقع ہے کہ اس سال سے طلبہ تعلیم حاصل کرنا شروع کر سکتے ہیں۔