ضلع بارہمولہ میں سوپور قصبے کے سیلو علاقے کے دو حصوں کو ملانے والا لکڑی کا پل انتہائی خستہ ہو چکا ہے جو مقامی باشندوں کے مطابق ’’کسی بڑے حادثے کی وجہ بن سکتا ہے۔‘‘
ای ٹی وی بھارت کے ساتھ بات کرتے ہوئے مقامی لوگوں نے بتایا کہ دہاییاں قبل اس پل کو تعمیر کیا گیا تاہم انتظامیہ کی جانب سے اسکی مرمت کے حوالے سے کبھی بھی سنجیدہ اقدامات نہیں اٹھائے گئے، بلکہ ’’ہر بار عوام از خود اسکی مرمت کرتی آ رہی ہے۔‘‘
سیلو گاؤں کے دو حصوں کو ملانے والا پل کافی خستہ ہو چکا ہے جس سے اس پر چلنا انتہائی خطرناک بن چکا ہے۔ انہوں نے کہا: ’’پل کو پار کرتے ہوئے کئی بار بچے اور بزرگ نالے میں جا گرے جن میں کئی زخمی بلکہ بعض فوت بھی ہو چکے ہیں۔‘‘
انہوں نے مزید کہا کہ پل کی خستہ حالی کے حوالے سے انتظامیہ سے کئی بار پختہ پل تعمیر کرنے کی گزارشات کی گئیں تاہم ’’ہماری کسی نے نہیں سنی۔‘‘
اس ضمن میں ای ٹی وی بھارت کے نمائندے نے ایکزیکٹیو انجینئر آر اینڈ بی مظفر خان سے بات کی تو انہوں نے کہا کہ ’’ڈی پی آر (DPR Project Report) بنایا گیا ہے، پروجیکٹ کی منظوری اور فنڈس کی واگزاری کے بعد بہت جلد پل کی تعمیر کا کام شروع کیا جائے گا۔‘‘