کشمیری نوجوان کے گانے کی دھوم

بارہمولہ کے سوپور سے تعلق رکھنے والے رئیس نے حال ہی میں اپنے دوست ہرکشن سنگھ کے ساتھ مل کر ایک گانا (جگری دوست) بھی گایا ہے جس کی سوشیل میڈیا پر دھوم ہے۔

جموں و کشمیر کے نوجوانوں میں صلاحیت کی کوئی کمی نہیں ہے۔ یہاں کے نوجوان ملک کی دیگر ریاستوں میں مختلف شعبوں سے وابستہ ہیں اور اپنی قابلیت کا لوہا منوارہے ہیں۔ تاہم وسائل کی کمی کی وجہ سے بعض نوجوانوں کو مشکلات بھی پیش آرہی ہیں۔

ایسی ہی ایک مثال شمالی کشمیر میں ضلع بارہمولہ کے سوپور سے تعلق رکھنے والے ایک نوجوان رئیس رسول عرف وٹالی کی دی جاسکتی ہے جو گذشتہ 9 برس سے میوزک سے جڑے ہوئے ہیں اور موسیقی میں ہی اپنا مستقبل بنانے کے لیے کوشاں ہیں۔

رئیس نے موسیقی میں بیچلرز اور ماسٹرز کی ڈگری حاصل کی اور حال ہی میں اپنے دوست ہرکشن سنگھ کے ساتھ مل کر ایک گانا (جگری دوست) بھی گایا ہے جس کی سوشیل میڈیا پر دھوم ہے۔ کشمیر میں بہتر پلیٹ فارم نہ ہونے کی وجہ سے ریس ممبئی جانا چاہتے ہیں اور وہاں وہ میوزک انڈسٹری سے جڑنے کے خواہاں ہیں۔

کشمیری نوجوان نے بتایا کہ انہیں ہر وقت اپنے والدین کا بھرپور تعاون حاصل رہا ہے اور وہ کافی خوش ہیں۔ ریس ممبئی جاکر موسیقی کی دنیا میں ریاست اور ملک کا نام روشن کرنا چاہتے ہیں۔ ریس نے بتایا کی کشمیری نوجوانوں میں صلاحیت کی کوئی بھی کمی نہیں ہے لیکن مناسب وسائل نہ ہونے کی وجہ سے وادی کے نوجوانوں کو مشکلات کا سامنا کرنا پڑتا ہے۔

انہوں نے حکومت سے کشمیری نوجوانوں کو بھی مناسب وسائل فراہم کرنے کا مطالبہ کیا اور کشمیر میں بھی میوزک انڈسٹری قائم کرنے کی اپیل کی۔ انہوں نے نوجوانوں سے سخت محنت کرنے کی بھی گذارش کی۔