بارہمولہ: محکمہ جنگلات کی جانب سے ’انسداد تجاوزات مہم‘

بارہمولہ کے بونیار میں محکمہ جنگلات نے ہفتے کے روز ایف پی ایف کے ساتھ مل کر باتنگی اور برنیٹ جنگلاتی حدود میں انسداد تجاوزات مہم چلائی۔

انسداد تجاوزات مہم میں محکمہ جنگلات بونیار کے رینج آفیسر کے علاوہ دیگر اہلکار و جنگلات بچاؤ فورس کی ٹیم نے بھی حصہ لیا۔ مہم کے دوران عہدیداروں نے جنگلات کی زمین پر غیرقانونی کھیتی باڑی ختم کردیا اور تقریبا 50 کنال اراضی کو دوبارہ حاصل کرلیا گیا۔ حکام نے بتایا کہ اس سلسلہ میں مجرمین کی تلاش جاری ہے۔

مہم کی کامیابی سے متعلق بتاتے ہوئے محکمہ جنگلات کے عہدیدار نے بتایا کہ غیرقانونی طور پر جنگلات کی زمین پر تجاوزات کرنے والوں کو بخشا نہیں جائے گا اور ان کے خلاف سخت قانونی کاروائی کی جائے گی۔ انہوں نے عام عوام سے محکمہ کی مدد کرنے کی اپیل کی۔