بانڈی پورہ: اسپتال میں بنیادی سہولیات کا فقدان

مقامی لوگوں نے ضلع انتظامیہ سے اپیل کی ہے کہ وہ ضلع کے دیگر ہیلتھ مراکز کی طرح اس اسپتال کی جانب بھی توجہ دیں۔

ضلع بانڈی پورہ کے نائدکھے علاقے میں واقع ہیلتھ سینٹر میں سہولیات کی کمی کے پیشِ نظر متعلقہ پنچایت ممبران، تاجر اور مقامی شہریوں نے تشویش کا اظہار کیا ہے۔ مقامی لوگوں کا کہنا ہے کہ یہ ہیلتھ سینٹر پہلے بہتر طریقے سے چل رہا تھا اور یہاں مریضوں کی خاصی تعداد علاج و معالجے کے لیے آتی تھی۔ لیکن یہاں بنیادی سہولیات نہ ہونے کی وجہ سے مریض دوسرے ہسپتالوں کا رخ کررہے ہیں۔

مقامی لوگوں کا کہنا ہے کہ انہوں نے اس سلسلے میں انتظامیہ سے کئی بار بات کی لیکن انتظامیہ نے ان کی بات پر توجہ نہیں دی۔ اس وجہ سے یہاں بڑی آبادی کو علاج و معالجے کی سہولیات میسر نہیں ہیں۔ لوگوں کو پریشان ہوکر دوسرے ہسپتالوں کا رخ کرنا پڑتا ہے۔

مقامی لوگوں نے ضلع انتظامیہ سے اپیل کی ہے کہ وہ ضلع کے دیگر ہیلتھ مراکز کی طرح اس ہسپتال کی جانب بھی توجہ دیں تاکہ یہاں بہتر سہولیات میسر ہوں اور مریضوں کو اپنے ہی علاقے میں علاج و معالجے کی سہولیات دستیاب ہوں۔