بانڈی پورہ: رازدان ٹاپ پر تازہ برفباری سے گریز بانڈی پورہ روڈ بند

بانڈی پورہ کے رازدان ٹاپ کے علاوہ ضلع کے مختلف علاقوں میں گذشتہ رات تازہ برفباری کی اطلاع ہے۔ جبکہ میدانی علاقوں میں جمعہ کے روز ہلکی بارش ہوئی ہے جس سے درجہ حرارت میں کافی کمی آئی ہے۔

بانڈی پورہ کے گریز روڈ پر واقع راز دان ٹاپ پر تازہ برفباری کے باعث ضلع انتظامیہ نے ایک بار پھر اسے آمد ورفت کے لیے بند کردیا ہے۔ گذشتہ رات رازدان ٹاپ کے علاوہ ضلع کے مختلف علاقوں میں بھی برفباری کی اطلاع ہے، جب کہ میدانی علاقوں میں جمعہ کے روز ہلکی بارش ہوئی ہے جس سے درجہ حرارت میں کافی کمی آئی ہے۔

ایس ڈی ایم گریز ڈاکٹر مدثر نے بتایا کہ گریز میں دوپہر تک تین انچ، جب کہ سطح سمندر سے بارہ ہزار فٹ اونچے رازدان ٹاپ اور گریز کے دیگر پہاڑوں پر آٹھ انچ کے قریب برفباری ہوئی ہے جس کی وجہ سے معمولات زندگی متاثر ہوئی ہے۔

رازدان ٹاپ پر برف جمے ہونے اور روڈ پر آمد ورفت نہ ہونے کی وجہ سے فی الحال وادی گریز باقی علاقوں سے کٹ چکا ہے۔ تاہم ڈی ڈی سی بانڈی پورہ ڈاکٹر اویس کا کہنا ہے کہ اس علاقے کے لیے پہلے ہی اشیا خوردونوش و دیگر ضروری سامان پہنچایا گیا ہے۔