شمالی کشمیر میں ضلع بانڈی پورہ کے سرحدی علاقہ گریز میں گزشتہ کئی برسوں سے منعقد کیے جانے والے فیسٹیول ’’جشن گریز‘‘ کے لئے تیاریاں شروع ہو رہی ہیں۔
سرحدی قصبہ میں ’’جشن گریز‘‘ سے قبل ایک ریلی کا انعقاد کیا گیا، جس کا مقصد منتظمین کے مطابق ’’جشنِ گریز کے لئے ایک صاف و شفاف ماحول کو تیار کرنا ہے۔‘‘
ریلی کے دوران ایک صفائی مہم کا آغاز کیا گیا جس کے دوران گریز کے مین قصبہ داور کی صفائی کی گئی۔ ریلی داور مارکیٹ کے مین چوک سے شروع ہو کر قریب ساڑھے تین کلومیٹر کا دائرہ مکمل کرنے کے بعد سومو اسٹینڈ پر اختتام پذیر ہوئی۔
منتظمین کے مطابق ’’اس پروگرام کے انعقاد کا اصل مقصد عوام کو ایک مضبوط پیغام دینا تھا کہ ایک دور دراز سرحدی علاقہ ہونے اور مناسب انفراسٹرکچر کی کمی کا سامنا ہونے کے باوجود گریز کی عوام اس خوبصورت وادی کو سیاحتی مقام کے طور پر محفوظ بنانے کے متحد اور پر عزم ہے۔‘‘
ریلی کے دوران نوجوان ’’گریز سج رہا ہے جشن گریز کے لئے‘‘ کے نعرے بلند کر رہے تھے۔