بینک لوٹنے کی کوشش

ریاست مہاراشٹر کے ضلع اورنگ آباد کے ہڈکو ٹی وی سینٹر علاقے میں اے ڈی سی سی بنک کو لوٹنے کی ناکام کوشش کی گئی۔

بینکوں میں دو دن کی تعطیل ہونے کی وجہ سے لٹیروں نے رات کے اندھیرے میں بینک کے عقبی حصے سے باتھ روم کے راستے داخل ہوئے اور نقد رقم لوٹنے کی کوشش کی لیکن بینک کی تجوری توڑنے میں انھیں کامیابی نہیں ملی۔

پولیس کا کہنا ہے کہ یہ سب بینک انتظامیہ کی لاپروائی کی وجہ سے ممکن ہو پایا کیونکہ دو برس قبل بھی بینک میں چوری کی ناکام کوشش کی گئ تھی، اس وقت ہی بینک انتظامیہ کو سی سی ٹی وی کیمرے نصب کرنے کی ہدایت کی گئی تھی۔ انتظامیہ نے کیمرے تو نصب کیے گئے ہیں لیکن جس وقت واردات پیش آئی کیمرے کام نہیں کر ر ہے تھے۔

پولیس کا کہنا ہے کہ بینک کی عمارت بھی خستہ حال ہو چکی ہے اور سیکورٹی کا معقول انتظام نہیں ہونے کی وجہ سے لٹیروں کو موقع ملا ہے۔

بینک میں چوری سے متعلق سڈکو پولیس اسٹیشن میں کیس درج کیا گیا ہے۔ بینک میں انیس لاکھ روپئے نقد رقم تھی جو لٹیروں کے ہاتھ نہیں لگ پائی۔ پولیس کو شبہ ہے کہ دو سے تین لٹیرے اس واردات میں ملوث ہو سکتے ہیں ان کی تلاش جاری ہے۔