مہاراشٹر کے وزیر صحت کا اورنگ آباد دورہ

کورونا کے مریضوں کی تعداد میں تشویشناک اضافہ ہو رہا ہے جس کو دیکھتے ہوئے مہاراشٹر کے وزیر صحت راجیش ٹوپے نے اورنگ آباد کا یک روزہ دورہ کیا۔

اپنے یک روزہ دورے میں ریاستی وزیر نے ضلع کلکٹر آفس اور ڈیویژنل کمشنر آفس میں مراٹھواڑہ ریجن کے اعلی سرکاری حکام کے ساتھ میٹنگ کی۔ اس میٹنگ میں اورنگ آباد شہر میں کورونا وبا کے مریضوں کی تعداد کے اسباب کا جائزہ لیا گیا۔

اس کے علاوہ ریاستی وزیر نے اورنگ آباد شہر کی تاریخی جامع مسجد کے احاطے میں پہنچ کر سعید ہال کا معائنہ کیا۔ یہ ہال قرنطینہ مریضوں کے لیے مختص کیا گیا ہے۔ ریاستی وزیر صحت نے قلعہ آرک کے کورونا کیئر سینٹر پہنچ کر مشتبہ متاثرین سے بات چیت کی اور ان کا حال جاننے کی کوشش کی۔

وزیر ٖصحت دورہ کرتے ہوئے

ریاستی وزیر راجیش ٹوپے نے اورنگ آباد کے کنٹونمنٹ علاقوں کا بھی جائزہ لیا۔ واضح رہے کہ اورنگ آباد شہر میں کورونا کے مثبت مریضوں کی تعداد چھ سو پچاس سے تجاوز کر گئی ہے اور کورونا سے ہلاک ہونے والوں کی تعداد بڑھ کر سترہ ہو چکی ہے۔