اننت ناگ: خاتون کی موت پر رشتہ دار برہم، گھر نذر آتش

ضلع اننت ناگ کے مومن آباد میں ایک 30 سالہ خاتون کو مبینہ طور پر اپنی سسرال میں پھانسی پر لٹکتے ہوئے پایا گیا۔ اس کے بعد خاتون کے رشتہ داروں نے مکان میں توڑ پھوڑ کی اور مکان کو نذر آتش کر دیا۔

مومن آباد میں پیر کی صبح 30 سالہ خاتون کو اپنی سسرال میں پھانسی پر لٹکتے ہوئے پایا گیا۔ خاتون کی پہچان نفیسہ زوجہ عاطف گل مسگر کے طور پر ہوئی ہے۔ خبر سنتے ہی مذکورہ خاتون کے رشتہ دار وہاں پہنچ گئے اور مکان میں توڑ پھوڑ کی۔

بعد میں گھر میں موجود ہلاک شدہ خاتون کی ساس اور سسر کو باہر نکال کر مکان میں تیل چھڑک کر نذر آتش کیا گیا۔

ہلاک شدہ خاتون کے رشتہ داروں نے سڑک پر دھرنا دے کر ٹریفک کی نقل و حمل بھی کافی دیر تک متاثر کی، تاہم پولیس نے موقعۂ واردات پر پہنچ کر حالات کو قابو میں کیا۔

بعد میں فائر بریگیڈ کا عملہ بھی موقع پر پہنچ گیا اور آگ پر قابو پایا۔