اننت ناگ: ٹپر کی زد میں آنے سے ایک خاتون ہلاک

اننت ناگ کے شرپورہ علاقہ میں تیز رفتار ٹپر کی زد میں آنے سے ایک 40 سالہ خاتون کی موت ہوگئی۔

اطلاعات کے مطابق وانگم شانگس کی رہنے والی چالیس سالہ نسرین بانو نامی ایک خاتون اپنے شوہر کے ہمراہ موٹر سائیکل سے جارہی تھی اسی دوران ایک تیز رفتار ٹپر نے ان کی موٹر سائیکل کو ٹکر ماردی جس سے نسرین شدید زخمی ہو گئی۔

زخمی خاتون کو ضلع ہسپتال اننت ناگ منتقل کیا گیا۔ جہاں ڈاکٹروں نے اسے مردہ قرار دیا۔بتایا جا رہا ہے کہ مذکورہ خاتون کی حالت کافی خراب تھی جس کے سبب ہسپتال لے جانے کے دوران راستے میں ہی اس کی موت ہوگئی۔ پولیس نے اس سلسلہ میں مقدمہ درج کر لیا ہے۔